Bıyl Balqash kóliniń jaǵalaýynda etnoaýyl, oıyn-saýyq keshenderi salynady – Jeńis Qasymbek
Aımaq basshysymen kezdesý «Dostyq» balalar-jasóspirimder shyǵarmashylyq ortalyǵynyń ǵımaratynda ótti. Basqosýda qala halqynyń ómiri, týrızmdi damytý, áleýmettik jáne qurylys salasyna qatysty kóptegen máseleler sóz boldy.
Prıozersk turǵyndary ákimnen jastardy suranysqa ıe mamandyqtarǵa oqytatyn kolledj ashýdy surady. Sonymen qatar, kezdesýge qatysýshylar Mádenıet úıi men dene shynyqtyrý-saýyqtyrý keshenin (DSK) salý qajettiligi týraly aıtty. Oblys ákimi jyl sońyna deıin DSK jobalyq-smetalyq qujattamasyn ázirleýdi tapsyrdy.
«DSK-dan bastaıyq, Mádenıet úıi boıynsha máseleni birtindep sheshetin bolamyz. Kolledjge qatysty kótergen máseleni qoldaımyz, nusqalardy qarastyramyz. Árbir máseleni baqylaýda ustaıtyn bolamyn», - dedi Jeńis Qasymbek.
Turǵyndarǵa Balqashpen avtobýs qatynasynyń bolmaýy da qolaısyzdyq týdyratyny aıtyldy. Ákim bul máseleniń de sheshiletinin jetkizdi.
Prıozersk Balqash kýrorttyq aımaǵyna kiredi. Kezdesýge qatysýshylardyń pikirinshe, týrızmdi nasıhattaýǵa jáne demalýǵa jaǵdaı jasaý kerek.
«Bizdiń qalamyz elge tanymal. Týrısterdiń kóbirek kelýin qalaımyn. Ol úshin salany damytyp, jarnamany kúsheıtý qajet», — dep atap ótti Prıozersk qalasynyń turǵyny Ádilbek Berdimuratov.
Ótken jyly qaladaǵy Balqash kóliniń jaǵalaýy abattandyryla bastady. Bıyl etnoaýyl, oıyn-saýyq kesheniniń qurylysy josparlanýda.
Jıynda ár qatysýshy óz oıyn aıta aldy. Ashyq mıkrofon formatyndaǵy mundaı kezdesýler bıliktiń tıimdi dıalogyn qurýǵa múmkindik beredi.
«Jergilikti bılik sheshe almaıtyn máselelerdi tikeleı aıtýǵa múmkindik bar. Búgin biz óz problemalarymyz týraly aıttyq», — deıdi qala turǵyny Nurǵalı Qarabekov.
Jeńis Qasymbek sonymen birge jeke qabyldaý ótkizdi. Prıozersk turǵyndary turǵyn úı, kóshelerdi jaryqtandyrý jáne abattandyrý máselelerin qozǵady. Turǵyndardyń biri Transportnaıa kóshesindegi joldy retke keltirýdi ótindi.
Jeńis Qasymbek quzyrly organ ókilderine qarjy taýyp, bıyl jóndeý jumystaryn júrgizýdi tapsyrdy.
Saryshaǵan turǵyny, kóp balaly ana Alma Ábildaeva óz isin keńeıtýge qoldaý kórsetýdi surady. Ol balyq óńdeýmen aınalysady, biraq qosymsha jabdyq satyp alý úshin grant ala almady.
Oblys ákimi áıelge qoldaý kórsetýdiń joldaryn qarastyryp, máseleni sheshýdi tapsyrdy.
Jalpy, oblys basshysy sheshimi tabylmaıtyn máseleler joq ekenin, birte-birte barlyq máseleni sheshetinin aıtty. Jergilikti bılik aldyna aı saıyn árbir qoıylǵan suraqtyń sheshilý barysy týraly baıandap otyrý mindetin qoıdy.
