Bıyl balaly otbasylardy áleýmettik qoldaý shyǵyndary 200 mlrd teńgege artty
«Respýblıkalyq bıýdjetten jáne Memlekettik áleýmettik saqtandyrý qorynan balaly otbasylardy áleýmettik qoldaýǵa arnalǵan shyǵystar 2019 jylmen salystyrǵanda 2020 jyly 209,5 mlrd teńgege ulǵaıdy», - dedi ol Ortalyq kommýnıkatsııalar qyzmetinde onlaın rejımde ótken halyqqa esep berý kezdesýi barysynda.
Onyń atap ótýinshe, memleket balalary bar otbasylarǵa respýblıkalyq bıýdjetten beriletin járdemaqynyń 6 túrine kepildik beredi. Áleýmettik saqtandyrý júıesiniń qatysýshysy bolyp tabylatyn jumys isteıtin áıelder Memlekettik áleýmettik saqtandyrý qorynan júktilik pen bosaný jáne balanyń 1 jasqa deıingi kútimi boıynsha 2 tólem túrin alady. Sondaı-aq, dekrettik demalystaǵy áıelderge zeınetaqy jarnalary respýblıkalyq bıýdjetten sýbsıdııalanady.
2019 jyly osy maqsattarǵa 372 mlrd teńge, onyń ishinde 200 mlrd teńge – járdemaqy tóleýge, 167 mlrd teńge – MÁSQ-tan áleýmettik tólemderge, 5 mlrd teńge – zeınetaqy jarnalaryn sýbsıdııalaýǵa jumsaldy.
«2020 jyly balalary bar otbasylardy qoldaýǵa jalpy 581,5 mlrd teńge, onyń ishinde járdemaqy tóleýge – 389 mlrd teńge, MÁSQ-tan áleýmettik tólemderge – 186,5 mlrd teńge, zeınetaqy jarnalaryn sýbsıdııalaýǵa – 6 mlrd teńge baǵyttaý josparlanǵan», – dedi Birjan Nurymbetov.
