Bıyl Baký porty arqyly júk tasymaldaý kólemi 3,2 ese ósti

BAKÝ. QazAqparat - Qazaqstan men Ázerbaıjan Kóshbasshylary búgingi kelissózderde eki el arasyndaǵy strategııalyq qarym-qatynasty jáne ekijaqty yntymaqtastyqty odan ári nyǵaıtý baǵytyn quptaıdy. QR Prezıdenti Qasym-Jomart Toqaevtyń Bakýge resmı saparyna oraı túsinikteme bergen ekonomıkalyq sholýshy Anar Azızov osyndaı pikir bildirdi, dep habarlaıdy QazAqparat tilshisi.

«Ázerbaıjan-Qazaqstan qarym-qatynasy damyp keledi. Taýar aınalymy ósim kórsetip otyr. Biraq taraptar arasyndaǵy ekonomıkalyq ózara is-qımyldyń áleýeti birneshe ese kóp. Energetıka, kólik, AÓK, bıznes-qurylymdar arasyndaǵy ózara is-qımyl salalarynda yntymaqtastyqty arttyrý úshin úlken áleýet bar», - dep atap ótti sarapshy.

Onyń aıtýynsha, geosaıası jáne geoekonomıkalyq jaǵdaılar Ázerbaıjan men Qazaqstan arasyndaǵy ózara is-qımyldy kúsheıtýdi talap etedi. Osyǵan baılanysty negizgi baǵyttardyń biri kólik salasy sanalady.

«Biz Qazaqstannyń Middle Corridor dep atalatyn Transkaspıı halyqaralyq kólik dálizin belsendi paıdalanýǵa umtylysyn kórip otyrmyz. 2022 jyldyń 7 aıynda Qazaqstannan Baký halyqaralyq teńiz porty arqyly júk tasymaldaý kólemi shamamen 1 mln tonnany qurady jáne ótken jyldyń osyndaı kezeńimen salystyrǵanda 3,2 ese ósti. Ázerbaıjanda Qazaqstannan júkterdi aýystyryp tıeý kólemin aıtarlyqtaı arttyrý úshin daıyn kólik ınfraqurylymy bar», - dedi Anar Azızov.

Ekonomıst Qazaqstan Prezıdenti eldiń teńiz flotyn nyǵaıtýǵa nıetti ekenine nazar aýdardy.

«Ázerbaıjan keme jasaý zaýytyn salǵany belgili. Osylaısha, Ázerbaıjan tarapy Qazaqstan úshin kez kelgen teńiz kemelerin jasaý tapsyrystaryn oryndaı alady. Qazaqstanda temir jol lokomotıvterin shyǵaratyn zaýyt bar jáne qazaqstandyq tarap Ázerbaıjannan osy baǵytta jańa tapsyrystar ala alady», - dedi ol.

Sondaı-aq, onyń aıtýynsha, bıznes-qurylymdar arasyndaǵy ózara is-qımyl, birlesken ónerkásiptik jáne agrarlyq kásiporyndar qurý salasynda da mol áleýet bar. Elderdiń azyq-túlik qaýipsizdigin kúsheıtý qajettiligi aıasynda AÓK salasy da erekshe qyzyqty. Sondyqtan Baký men Nur-Sultan úshinshi elderge jyldyq ónimdi jetkizý múmkindigimen bıdaı, agrarlyq ónimniń basqa da túrlerin óndirý salasyndaǵy jobalardy talqylaı alady. Búgin Bakýde Ázerbaıjan-Qazaqstan Іskerlik keńesiniń birinshi otyrysy ótedi. Onyń qorytyndysynda birqatar qujatqa qol qoıý josparlanǵan.

«Energetıka salasyndaǵy yntymaqtastyq basym baǵyttardyń biri ekeni sózsiz. Búginde Qazaqstan munaı eksportymen belgili bir qıyndyqtardy bastan keshýde jáne munaı óndirýdi ulǵaıtý josparlaryn eskere otyryp, jańa baǵyttar izdeýde. Ázerbaıjan bul úshin baǵyttardyń biri bola alady. Onyń ústine Ázerbaıjan tarapy bul máseleni Qazaqstan tarapynyń aldynda kótergen de edi. Iá, ol úshin birqatar tehnıkalyq máselelerdi sheshý qajet jáne úkimetaralyq komıssııa aıasynda bul máselelerdi sheshýge bolady. Sonymen qatar, taraptar munaı-gaz jabdyqtaryn óndirý jáne qyzmet kórsetý, munaı-servıstik qyzmet kórsetý salasynda belsendi yntymaqtasa alady», - dedi ekonomıst.

Anar Azızov ýaǵdalastyqtardy iske asyrý ekijaqty qarym-qatynasty sapaly jańa deńgeıge shyǵarýǵa múmkindik beredi dep sanaıdy. Budan basqa, taraptar aldaǵy jyldary ózara taýar aınalymyn ulǵaıtý jáne ony jańa birlesken jobalar esebinen 1 mlrd dollarǵa deıin jetkizý mindetin qoıady dep kútýge bolady.