Bıyl BAQ jáne mádenıet qyzmetkerleri prezıdenttik «Bolashaq» baǵdarlamasyna qatysa alady
ASTANA. QazAqparat - Aǵymdaǵy jyly BAQ jáne mádenıet qyzmetkerleri «Bolashaq» baǵdarlamasyna qatysýǵa ótinish bildire alady, dep habarlady Primeminister.kz saıtyna bergen suhbatynda QR Bilim jáne ǵylym mınıstrligi (BǴM) janyndaǵy «Bolashaq» Halyqaralyq baǵdarlamalar ortalyǵynyń prezıdenti Ǵanı Nyǵymetov.
«Bul stıpendııaǵa bıyl BAQ jáne mádenıet qyzmetkerleri de qol jetkize alady», - dedi Ǵ.Nyǵymetov.
Sondaı-aq, onyń sózine qaraǵanda, aǵylshyn jáne qazaq tilin bilýge qatysty talaptar kúsheıtildi. Osylaısha aǵylshyn tilinen IELTS emtıhanynda 9 upaıdyń kem degende 4,0 jınaý qajet.
Sonymen qatar ol ótken jyldan bastap táýelsiz sarapshylar komıssııasynyń quramyna memlekettik qyzmetkerlermen birge ǵylymı-akademııalyq salanyń mamandary da engenin atap ótti.
«Bolashaq» HBO baǵdarlama túlekterimen onlaın-alańda qarym-qatynas ornatýdy júzege asyryp, úgit-nasıhat jumystaryn kúsheıtýdi josparlap otyr.
«Osy maqsatta men jáne ortalyqtyń ózge de ókilderi monoqalalar men oblys ortalyqtaryna baramyz. Sonymen qatar Astana, Almaty jáne Atyraý qalalarynda «Bolashaq» túlekteriniń 4 shaǵyn forýmyn ótkizý kózdelgen», - dedi HBO basshysy.
