Bıyl Azııa-Tynyq muhıty óńiriniń ekonomıkalyq damýy 6,2 paıyz deńgeıinde bolady - ADB
ASTANA. QazAqparat - 2014 jyly Azııa-Tynyq muhıty óńiriniń ekonomıkalyq damýy 6,2 paıyz deńgeıinde bolmaq. Bul týraly búgin Azııa damý banki Basqarýshylar keńesiniń 47-shi otyrysynda ADB prezıdenti Takehıko Nakao málim etti.
«Azııa ekonomıkasy óziniń qýattylyǵyn saqtap keledi. Damýshy Azııa-Tynyq muhıty óńirinde 2013 jyly JІÓ 6,1 paıyzǵa ósti. Aldaǵy merzimde úlken suranysqa oraı óńir tabysty bolady jáne ónerkásipti damyǵan elderde ekonomıkalyq ósimniń perspektıvalary jaqsarady dep boljanýda. Biz 2014 jyly óńirdegi ósim qarqynyn 6,2 paıyz, al 2015 jyly 6,4 paıyz deńgeıinde bolady dep kútýdemiz»,-dedi ol.
Onyń sózine qaraǵanda, óńirdegi damýǵa qatysty keıbir táýekelder saqtalýda. Bul óz kezeginde damyǵan ekonomıkalardyń monetarlyq saıasatynyń ózgerýine jáne óńirdegi keıbir ekonomıkalardyń ósim qarqynynyń tómendeýi yqtımaldyǵyna baılanysty bolýy múmkin.
«Óńirdiń makroekonomıkalyq ahýaly nyǵaıa tústi. Qarjylyq júıelerdi kapıtaldandyrýdyń joǵary paıyzdylyǵy baıqalýda. Sheteldik valıýtalardyń rezervteri artty. Aıyrbastaý baǵamynyń saıasaty ıkemdi bola tústi», - dedi Takehıko Nakao.
