Bıyl azamattyq qorǵanys organdaryna 353 tehnıka satyp alyndy
NUR-SULTAN. QazAqparat - Bıyl azamattyq qorǵanys organdarynyń bólimshelerin jaraqtandyrýǵa respýblıkalyq jáne jergilikti bıýdjetterdiń esebinen 353 tehnıka satyp alyndy. Bul týraly búgin QR ІІM Tótenshe jaǵdaılar komıtetiniń tóraǵasy Vladımır Bekker aıtty, dep habarlaıdy QazAqparat tilshisi.
«Bıyl azamattyq qorǵanys organdarynyń bólimshelerin jaraqtandyrýǵa respýblıkalyq jáne jergilikti bıýdjetterdiń esebinen 353 tehnıka alyndy. Mundaı jaıt egemen memlekettiń tarıhynda birde-bir ret bolǵan emes. Sonymen qatar 10 myńnan astam túrli qural-jabdyq jıyntyqtary tústi. Eger dál osy qarqynmen jabdyqtaı bersek, taıaý ýaqytta bólimshelerdiń jaraqtandyrylýy jaqsy kórsetkishke qol jetkizetin bolady», - dedi ol.
Onyń atap ótýinshe, Tótenshe jaǵdaılar komıtetine jergilikti atqarýshy organdar jan-jaqty kómek kórsetip otyr. Máselen, respýblıkalyq bıýdjet esebinen 113 tehnıka, buǵan qosa únemdelgen qarajat esebinen 54 tehnıka satyp alynǵan. Al jergilikti atqarýshy organdar esebinen 195 tehnıka satyp alynyp otyr.
«Tehnıkalar búkil óńirge bólindi. Bizge áli de kóp tehnıka kerek. Biraq, Úkimettiń sheshimi men Memleket basshysynyń qoldaýynyń arqasynda azamattyq qorǵanys organdaryna úlken nazar aýdarylyp otyr. Búgingi kúni jaraqtandyrylý normanyń 38-40 paıyzyn quraıdy. 2020 jyly jol kartasyn oryndaýdyń nátıjesinde jaraqtandyrý deńgeıin 55-58 paıyzǵa jetkizemiz dep oılaımyz. Áli de kóp qajettilik bar. Aıtalyq, osy jyly 70 órt sóndirý avtotsısternasyn satyp aldyq. Al qajettilik - 650. Biraq eń bastysy protsess bastaldy», - dedi V.Bekker.
