Bıyl Azamattyq hal aktilerin jazý (AHAJ) organdaryna - 90 jyl

Osyǵan qaraı jáne elimizdiń táýelsizdiginiń 20 jyldyǵyna oraı barlyq oblystyq ádilet departamentterinde saltanatty sharalar uıymdastyrylyp, AHAJ ardagerlerine qurmet kórsetilýde. Bul týraly búgin jýrnalıstermen bolǵan brıfıngte Ádilet mınıstrliginiń resmı ókili Erbolat Erimbet aıtty.

«1921 jyly QazKSR keńes halyqtary komıtetiniń dekreti negizinde azamattardyń hal aktilerin jazý organdary quryldy. Atalmysh organǵa azamattardyń esepteriniń memlekettik tizilimin júrgizý mindeti júkteldi. Ótken ǵasyrdyń 20-shy jyldaryna deıin azamattardyń hal aktilerin jazý isimen meshitter men shirkeýler aınalysqan bolatyn. Al 1935-1959 jyldar aralyǵynda Barlyq deńgeıdegi AHAJ bólimderi Ulttyq ishki ister komıteti (NKVD) júıesinde boldy. Al odan keıingi 35 jylda AHAJ organdary jergilikti atqarýshy organdardyń quzyrynda boldy. 1998 jyly AHAJ qyzmeti tolyqtaı Ádilet mınıstrligine berildi. Qazirgi tańda AHAJ organdary adamnyń týylǵan kúninen bastap qaıtys bolǵan kúninen deıingi ómirimen baılanysty jáıtterdi tirkep otyrady», - dedi resmı ókil.

Ol keltirgen málimetterge qaraǵanda, 1991 jyly elimizdegi 331 myń 805 adam dúnıege kelgen bolsa, 2010 jyly bul kórsetkish 364 myń 813-ti qurap, 1991 jylmen salystyrǵandaǵy kórsetkish 10 paıyzǵa artqan. 2010 jyly Ońtústik Qazaqstan oblysynda 75 myń 967 adam týylyp, elimizdiń aımaǵyndaǵy eń úzdik týý kórsetkishin quraǵan. Al respýblıka boıynsha bala eń az týylǵan aımaq Soltústik Qazaqstan oblysy. Onda 2010 jyly nebári 8 myń 751 bala týylǵan.