Bıyl aımaqtarda jańadan 36 sport nysany boı kóteredi
Aıta ketý kerek, sport ınfraqurylymyn qarjylandyrý, jóndeý jáne qaıta jabdyqtaý jumystary jergilikti ákimdikterdiń quzyretine kiredi. Atap aıtqanda, Aqtóbe, Almaty, Jetisý, Qaraǵandy, Mańǵystaý oblystarynyń árqaısysynda 4 sport nysanynan salynady.
Jambyl jáne Ulytaý oblystarynda 3 sport nysanynan salynsa, Abaı, Atyraý, Túrkistan oblystarynda 2 nysannan josparlanǵan. Aqmola, Batys Qazaqstan, Qyzylorda jáne Pavlodar oblystarynyń árqaısysynda 1 sport nysany jańadan boı kóteredi.
Budan bólek, bıyl jumys istep turǵan sport nysandaryn rekonstrýktsııalaý baǵytynda 9 nysandy jóndeýden ótkizý qarastyrylǵan.
Mádenıet jáne sport mınıstrligi ázirlegen Dene shynyqtyrý men sportty damytýdyń 2023-2029 jyldarǵa arnalǵan tujyrymdamasyna saı 2029 jylǵa qaraı elimizde jańadan 113 sport nysanyn qoldanysqa berý josparlanǵan. Sondaı-aq 20 sport nysanyn jańǵyrtyp, modernızatsııalaýdy jáne 6 sport nysanyn qaıta jabdyqtaýǵa nıetti.
«Dene shynyqtyrý jáne sportpen júıeli túrde aınalysatyn azamattarymyzdyń sanyn arttyrý úshin óńirlerde, ásirese aýyldyq jerlerde sport ınfraqurylymyn damytý qajet. Mádenıet jáne sport mınıstrligi jańa sport nysandaryn salý baǵytynda belsendi jumys júrgizip jatyr. 7 oblysta 10 dene shynyqtyrý-saýyqtyrý kesheni salyndy. 2029 jylǵa deıin jańadan 113 sport nysanynyń qurylysy josparlanyp otyr. Sondaı-aq ákimdiktermen az shyǵyndy qajet etetin, modýldi sport alańdaryn salý baǵytynda da birlese jumys atqaratyn bolamyz»,- dedi Mádenıet jáne sport vıtse-mınıstri Sársen Quranbek.
