Bıyl aýylsharýashylyq maqsatyndaǵy 30,6 mln. gektar alqapta túgendeý júrgiziledi - Úkimet otyrysy
ASTANA. 9 sáýir. QazAqparat - Bıyl aýylsharýashylyq maqsatyndaǵy jerlerdi túgendeý 30,6 mln. gektar alqapta júrgiziledi.
Bul týraly búgin selektorlyq tártiptegi Úkimet otyrysynda Óńirlik damý mınıstriniń birinshi orynbasary Qaıyrbek Óskenbaev málim etti.
«2013 jyly túgendeýdi 30,6 mln. gektar alańda júrgizý josparlanyp otyr. Óńirlik josparda shamamen 60 aýdan, 820 aýyldyq okrýg jáne 80 myń sharýashylyq sýbektileri tekseriletin bolady», - dedi birinshi vıtse-mınıstr.
Onyń aıtýynsha, tekserýdi júrgizýge barlyǵy daıyn. Osy oraıda barlyq materıaldyq qujatnamalyq bazalar ázirlenip, respýblıkalyq bıýdjetten qajetti qarajat bólindi.
Aıta keteıik, ótken jyly túgendeý sharalary 31 mln. gektardan astam alqapta júzege asyryldy.
