Bıyl aýyldy damytý baǵdarlamasy aıaqtalǵanymen, ondaǵy qoıylǵan mindetter aldaǵy jyldary da ózekti bolyp qalady - Q. Aıtahanov
ASTANA. Sáýirdiń 9-y. QazAqparat /Qanat Mámetqazyuly/ - Aǵymdaǵy jyly aýyldy damytý baǵdarlamasy aıaqtalǵanymen, ondaǵy qoıylǵan mindetter aldaǵy jyldary da ózekti bolyp qalady.
Búgin QR Parlamenti Senatynyń jalpy otyrysynda Úkimet basshysynyń atyna saýal joldaǵan senator Qýanysh Aıtahanov osylaı málim etti, dep habarlaıdy QazAqparat.
Óz saýalynda senator aǵymdaǵy jyly Aýyldyq aýmaqtardy damytýdyń 2004-2010 jyldarǵa arnalǵan memlekettik baǵdarlamasyn oryndaý merzimi aıaqtalatynyna toqtala kelip, baǵdarlama aıasynda atqarylǵan sharalarǵa da nazar aýdardy. Onyń aıtýynsha, baǵdarlama boıynsha aýyldyq aımaqtar áleýmettik-ekonomıkalyq damý deńgeıi boıynsha jiktelip, olardyń jaı-kúıine tereń taldaý jasalynǵan. Memleket tarapynan mıllıardtaǵan qarjy bólinip, júzdegen bilim men densaýlyq saqtaý nysandary, myńdaǵan shaqyrym jol, elektr, baılanys jelileri, taza aýyzsý nysandary salynyp, kóptegen aýyl gazben qamtamasyz etilgen. Daǵdarysqa qaramastan Memleket basshysynyń bastamasymen Jol kartasy baǵdarlamalary arqyly aýyldyń júzdegen áleýmettik jáne ınfraqurylym nysandary kúrdeli jáne aǵymdaǵy jóndeýden ótýde. Nátıjesinde, eldi mekenderdiń áleýmettik-ekonomıkalyq áleýeti ulǵaıdy, aýyl turǵyndarynyń jaǵdaıy edáýir jaqsardy.
«Degenmen, baǵdarlamanyń oryndalý merzimi bıylǵy jyly aıaqtalsa da, ondaǵy qoıylǵan mindetterdiń bir bóligi aldaǵy jyldarda da ózekti bolyp qala beredi. Aýylda áli osydan 40-50 jyl buryn salynǵan apattyq jaǵdaıdaǵy bilim berý men densaýlyq saqtaý nysandary, úsh aýysymda oqıtyn mektepter jetkilikti. Mektepke deıingi balalar mekemelerimen qamtý dárejesi tómen. Kóptegen eldi mekender gazben, elektr jelilerimen qamtamasyz etilmegen, sýdy tasyp ishedi, aýdan, aýylaralyq jol jaǵdaıy syn kótermeıdi. Baǵdarlamada kórsetilgen aýyldyq aımaqtardyń damýyna basymdyq beretin tıisti normatıvtik qujattar tolyq qabyldanbaǵan», dedi senator. Onyń aıtýynsha, agrarlyq salany damytý aýylda turatyn halyqtyń ómir sapasyn arttyrýdyń sheshýshi faktory bolyp tabylady. Sonymen birge, Q. Aıtahanov aýyl sharýashylyǵynda eńbek ónimdiligin 2014 jyly eki esege kóterý mindetin oryndaý úshin aýylǵa jańa tehnologııalar men ǵylymnyń ozat tájirıebelerin endirýdi kerek etetindigin alǵa tartty. Al bunyń ózi, senatordyń pikirinshe, aýyldaǵy jumys qolyn qysqartýy ábden múmkin. «Aýylda halqymyzdyń 47 paıyzy turatynyn jáne onyń jartysynan astamy ózin-ózi jumyspen qamtıtyn «jumyssyzdar» sanatyna jatatyny aýyl aýmaqtaryn jáne aýyl sharýashylyǵyn damytýǵa áli de kóp kóńil bóliný kerek ekenin aıqyndaı túsedi», dedi Q. Aıtahanov.
