Bıyl aýyldardy aýyzsýmen qamtýǵa 113 mlrd teńge jumsalady

ASTANA. QazAqparat – Bıyl aýyldardy aýyzsýmen qamtýǵa baǵyttalǵan 267 jobany iske asyrýǵa 113 mlrd teńge jumsalady. Bul týraly Úkimet otyrysynda Indýstrııa jáne ınfraqurylymdyq damý mınıstri Marat Qarabaev málim etti, dep habarlaıdy QazAqparat tilshisi.

«Bıyl sýmen jabdyqtaý jáne sý burý júıelerin salyp, rekonstrýktsııa jasaýǵa respýblıkalyq bıýdjetten 402 jobany iske asyrý úshin 280 mlrd teńge bólindi. Onyń ishinde qalalarda 135 jobany iske asyrýǵa 167 mlrd teńge jáne aýyldarda 267 jobaǵa 113 mlrd teńge bólindi», - dedi mınıstr.

Osynyń nátıjesinde bıyldyń ózinde aýyldardyń aýyzsý júıesimen jabdyqtalýyn 96 paıyzdan asyrý kózdelip otyr.

«Jyl qorytyndysy boıynsha sýmen jabdyqtaý qyzmetterine qoljetimdilikti qalalarda 98,8% jáne aýyldarda 96,3% qamtamasyz etý josparlanýda», - dedi Marat Qarabaev.