Bıyl aýyl sharýashylyǵy salasyndaǵy ósim 5 paıyz bolady dep boljanady
ASTANA. QazAqparat - Aǵymdaǵy jyly aýyl sharýashylyǵy salasyndaǵy ósim 5 paıyz, qurylys jumystarynyń ósimi 4,5 paıyz deńgeıinde kútiledi. Bul týraly búgin Parlament Májilisiniń jalpy otyrysynda Ulttyq ekonomıka vıtse-mınıstri Marat Qusaıynov málim etti. Eske salaıyq, jalpy otyrysta «2015-2017 jyldarǵa arnalǵan respýblıkalyq bıýdjet týraly» zańyna ózgerister men tolyqtyrýlar engizý týraly» zań jobasy talqylanǵan bolatyn.
Vıtse-mınıstrdiń aıtýynsha, aǵymdaǵy jylǵy qańtar-qazan aılarynda ekonomıkalyq ósimniń bir paıyzǵa deıin báseńdeýi eskerile otyryp, JІÓ naqty ósiminiń boljamy 1,2 paıyzǵa tómendetilgen. Buǵan birqatar sebepter áser etedi. «Atap aıtqanda, ónerkásip óndirisiniń byltyrǵy jylmen salystyrǵanda 1,8 paıyzǵa qysqarýyna negizdelgen, onyń ishinde jospardaǵy munaı óndirýdiń 1,5 mln. tonnaǵa tómendeýi áser etedi. Ónerkásiptik ónim óndirisi men syrtqy saýda kóleminiń tómendeýi nátıjesinde kórsetiletin qyzmetter salasyndaǵy ósim 2,5 paıyzǵa báseńdeýi boljanady. Sonymen qatar, aýyl sharýashylyǵyndaǵy ósim 5 paıyzdy, qurylys salasyndaǵy ósim 4,5 paıyzdy quraıdy dep kútiledi», - dedi M. Qusaıynov.
Onyń aıtýynsha, boljamdar boıynsha aǵymdaǵy jyly eksport kólemi byltyrmen salystyrǵanda 39,2 paıyzǵa tómendep, 48,8 mlrd dollardy, al ımport 21 paıyzǵa tómendep, 34,4 mlrd dollardy quraıtyn bolady.
