Bıyl aýyl sharýashylyǵy daqyldary alańy 237,7 myń gektarǵa ulǵaıtyldy

NUR-SULTAN. QazAqparat - Bıyl elimizde aýyl sharýashylyǵy daqyldary alańy 237,7 myń gektarǵa ulǵaıtyldy. Bul týraly QR Aýyl sharýashylyǵy mınıstri Saparhan Omarov esep berý kezdesýinde aıtty, dep habarlaıdy QazAqparat tilshisi.

«Koronavırýs pandemııasyna baılanysty aǵymdaǵy jaǵdaı azyq-túlik qaýipsizdigi, sondaı-aq aýyl sharýashylyǵyn damytý máseleleri basty máselelerdiń biri bolǵanyn kórsetti. Bıyl qazaqstandyq aýyl sharýashylyǵy ónimine suranystyń artqanyn eskere otyryp, aýyl sharýashylyǵy daqyldary alańy 237,7 myń gektarǵa ulǵaıtylyp, 22,5 mln gektarǵa deıin jetkizildi», - dedi ol.

Bul rette mınıstr egis alańdarynyń qurylymynda mynadaı rentabeldiligi joǵary daqyldardyń: maıly daqyldardyń 122,2 myń gektarǵa, azyqtyq daqyldardyń 308,6 myń gektarǵa, kókónis-baqsha daqyldarynyń 11,5 myń gektarǵa jetkizý), sondaı-aq joǵary suranysqa ıe qaraqumyqtyń 30,9 myń gektarǵa ósimi qamtamasyz etilgenin aıtty.

«Jalpy joǵaryda kórsetilgen sharalardy iske asyrý ósimdik sharýashylyǵynyń jalpy ónim kólemin 3,1 trln teńgege, ıaǵnı josparlanǵan ındıkatorlarǵa deıin ulǵaıtýǵa múmkindik beredi»,- dedi Saparhan Omarov.