Bıyl aýyl sharýashylyǵy daqyldary 22,5 mln gektarǵa egiledi - AShM
«2020 jyly aýyl sharýashylyǵy daqyldaryn 22,5 mln gektar alańǵa egý josparlanýda, bul 2019 jylǵy deńgeıden 238 myń gektarǵa kóp. Bul rette dándi jáne dándi-burshaqty daqyldar alańy 15,2 mln gektardy (193 myń gektarǵa kem), onyń ishinde bıdaı alańy 11,4 mln gektardy (4 myń gektarǵa kem) quraıdy», - dedi mınıstr.
Onyń sózine qaraǵanda, egis alańdaryn ártaraptandyrý men rentabeldiligi joǵary daqyldar óndirýge kóshý jumystary jalǵasýda. Maıly daqyldardyń boljamdy alańy 3 mln gektardy quraıdy, bul ótken jylǵydan 122 myń gektarǵa kóp. Kókónis-baqsha daqyldary men kartop alańy 19,3 myń gektarǵa, azyqtyq daqyldar alańy 309 myń gektarǵa ulǵaıady. Tehnıkalyq daqyldar (qant qyzylshasy, maqta, temeki) alańy 132 myń gektardy (18,6 myń gektarǵa kem) quraıdy.
«Qazirgi kezde ońtústik óńirler egis naýqanyna kirisip ketti. Máselen, Jambyl oblysynda 71,7 myń gektar alańǵa nemese jalpy egis kóleminiń 10,2 paıyzyna, Túrkistan oblysynda 33,5 myń gektar (4%), Almaty oblysynda 3,4 myń gektar (0,4%), Qyzylorda oblysynda 2 myń gektar (1,1%) alańǵa egis egildi», - dedi S. Omarov.
Vedomstvo málimetine qaraǵanda, soltústik jáne ortalyq óńirlerde jazdyq dándi daqyldardy egý 15-30 mamyr aralyǵynda, batys jáne ońtústik óńirlerde sáýirdiń úshinshi onkúndiginde jáne mamyrdyń birinshi onkúndiginde, shyǵys óńirde taýly aımaqta 30 sáýirden 25 mamyrǵa deıingi aralyqta, dalaly aımaqta 15-25 mamyr aralyǵynda júrgiziledi. Soltústik óńirde maıly daqyldardy egý 20-25 mamyrda, ortalyq, batys jáne shyǵys óńirlerde 5-15 mamyr aralyǵynda, Pavlodar oblysynda 1-15 mamyr aralyǵynda júzege asyrylady. Kóp jyldyq shópterdi egý qar erigennen keıin erte kóktemde barlyq jerde júrgiziledi.