Bıyl Atyraýdan Reseı shekarasyna deıingi joldyń 137 shaqyrymy paıdalanýǵa beriledi

ATYRAÝ. QazAqparat – Atyraýdan Reseı Federatsııasynyń shekarasyna deıin jetkizetin jol qaıta jańǵyrtylyp jatyr. Bıyl bul joldyń 137 shaqyrymy paıdalanýǵa beriledi, dep habarlaıdy QazAqparat tilshisi.

Atyraý oblystyq jolaýshylar kóligi jáne avtomobıl joldary basqarmasynyń basshysy Samat Aıtqalıevtyń málimetinshe, Atyraý oblysynan Reseıdiń Astrahan óńirine qatynaıtyn jol qurylysy birneshe ýchaskege bólingen.

«Bul – «Aqtóbe – Atyraý – Reseı Federatsııasynyń shekarasy» (Astrahan) baǵytyndaǵy respýblıkalyq mańyzy bar joldyń bir bóligi. Burnaǵy jyly jalpy uzyndyǵy 277 shaqyrym joldyń 60 shaqyrymy paıdalanýǵa berildi. Al, 217 shaqyrymyna qaıta jańǵyrtý jumystary júrgizildi. Qazir atalǵan joldyń 80 shaqyrymynda tómengi jol jabyndysymen qozǵalys ashyldy. Endi bıylǵy jyldyń sońyna deıin 137 shaqyrymynda tómengi jol jabyndysymen kólik qozǵalysyna ruqsat berý josparlanyp otyr», -dep habarlady Samat Aıtqalıev.

Onyń aıtýynsha, bul jobaǵa qazynadan 22,9 mlrd teńge qarjy bólingen. Onyń ishinde 12 mlrd teńge respýblıkalyq, al, 10,9 mlrd teńge jergilikti bıýdjetten qaralǵan.

Eske sala ketelik, buǵan deıin Atyraýdan Reseıge qatynaıtyn joldyń 9 shaqyrymy paıdalanýǵa berilgenin jazǵan bolatynbyz.

Joldyń alǵashqy (824-833 shaqyrym) 9 shaqyrymyn quraıtyn bóligine tómengi qabat jabyndysy tóselgen. Sol sebepten, kólik qozǵalysyna ruqsat berilgen. Jol tóseminiń eni – 9 metr, qalyńdyǵy – 57 santımetr.

Keıin atalǵan baǵyttaǵy jol qurylysy baıaý júrip jatqanyn habarlaǵan edik.