Bıyl Atyraýda 9 balabaqsha paıdalanýǵa beriledi

ATYRAÝ. QazAqparat – Bıyl Atyraý qalasynda 2610 oryndyq 9 balabaqsha paıdalanýǵa beriledi. Qazir balabaqshalar nysanynyń qurylysy aıaqtalǵan, dep habarlaıdy QazAqparat.

Oblystyq bilim basqarmasynyń basshysy Gúlnar Sadýahasova málimetinshe, óńirde 42 895 balany qamtıtyn 319 mektepke deıingi mekeme jumys isteıdi.

Onyń ishinde 252 memlekettik, 67 jekemenshik baqsha bar.

«Mektepke deıingi tárbıe beretin mekemelerdiń 151-i – balabaqsha, 101-i – shaǵyn ortalyq. Bulardaǵy 38 884 bala tárbıe alady. Al, jekemenshik mektepke deıingi uıym sany 67, onyń ishinde 58 balabaqsha, 9 shaǵyn ortalyq bar. Jeke ıeliktegi mekemelerdegi kontıngent 4011 balany quraıdy», -deıdi Gúlnar Sadýahasova.

Onyń aıtýynsha, balabaqshaǵa kezekti tolyq joıý maqsatynda oblys boıynsha 2025 jylǵa deıin 56 mektepke deıingi bilim nysanyn paıdalanýǵa berý josparlanyp otyr.

«Qazir Atyraý qalasynda jalpy syıymdylyǵy 2610 oryndyq 9 balabaqshanyń qurylysy aıaqtalyp, qujattary jasaqtalyp jatyr. Sodan keıin paıdalanýǵa beriledi. Jańa balabaqshalar Atyraý qalasyndaǵy Samal, Bereke, Batys Bereke, Aqjar-2, Erkinqala-2 shaǵyn aýdandarynda, sondaı-aq, Ábilqaıyr han, A.Baıtursynov, Belınskıı, Beıbarys kóshelerinde ornalasqan. Bul balabaqshalardyń bári 290 orynǵa eseptelgen», -dep málim etti Gúlnar Sadýahasova.

Ótken jyly Atyraý oblysynda balabaqshamen qamtý kórsetkishi 82%, mektepaldy daıarlyqpen qamtamasyz etý 100% quraǵan.

Eske sala ketelik, buǵan deıin Atyraýda 160 oryndyq jańa balabaqsha ashylǵanyn jazǵan bolatynbyz.

Keıin Atyraýda taǵy bir jańa balabaqsha boı kóterip, paıdalanýǵa berildi.

Foto: óńirlik kommýnıkatsııalar qyzmeti