Bıyl Atyraýda 648 otbasy jańa páter alady
ATYRAÝ. QazAqparat – Atyraýda 648 otbasy jańa páter alady, dep habarlaıdy QazAqparat.
Oblystyq qurylys basqarmasy basshysynyń mindetin atqarýshy Mereı Jantóreevtiń málimetinshe, jańa páterler Atyraý qalasyndaǵy «Bereke» shaǵynaýdanynda salynyp jatqan 9 kópqabatty úıden beriledi.
Jańa turǵyn úılerdi kóktemde paıdalanýǵa tapsyrý kózdelip otyr.
«Bıyl paıdalanýǵa beriletin turǵyn úılerdiń jalpy alańy - 47 530 sharshy metr. Qazir «Zapad stroı ERS» JShS turǵyn úı qurylysyn memlekettik-jekemenshik áriptestik aıasynda júzege asyrýda», - deıdi Mereı Jantóreev.
Onyń aıtýynsha, kelisimshartqa sáıkes «Zapad stroı ERS» JShS kópqabatty úılerdi bıylǵy maýsymǵa deıin paıdalanýǵa beredi.
Sodan keıingi 5 jylda turǵyn úıge qyzmet kórsetýge mindetteme qabyldaǵan.
Eske sala ketelik, budan buryn 150-deı atyraýlyq otbasy baspanaly bolǵan edi.
