Bıyl Atyraý oblysynda 10 myń gektarǵa kókónis, baqsha daqyldary egiledi
Oblystyq Aýyl sharýashylyǵy basqarmasynyń basshysy Salaýat Óteǵulovtyń málimetinshe, egistik alqabynyń jalpy kólemi 10 315 gektardy quraıdy. Onyń ishinde 2 939 gektarǵa kókónis, 2 003 gektarǵa kartop, 1 338 gektarǵa baqsha, 4 035 gektarǵa mal azyqtyq daqyldary egiledi.
«Aýyl sharýashylyǵy salasyndaǵy 340 qurylymda 170 traktor, 90 arnaıy tehnıka men sý nasosy bar. Oblystaǵy 91 sharýashylyqtyń suranysyna baılanysty kóktemgi dala jumystaryn júrgizý úshin jeńildetilgen baǵamen 800 tonna dızel otyny bólindi. Dızel otynyn tasymaldaıtyn operatorlardy anyqtaıtyn konkýrstyq komıssııa quryldy. Arnaıy kestege sáıkes jaǵarmaı 20 sáýirden jetkizile bastaıdy», - deıdi Salaýat Óteǵulov.
Onyń aıtýynsha, aýyl sharýashylyǵy qurylymdary 1507 tonna mıneraldyq tyńaıtqysh túrlerin satyp alýdy kózdegen. Osy kezge deıin 360 tonna tyńaıtqysh satyp alynǵan. Endi 1147 tonna tyńaıtqyshty alý úshin kelisimshart jasaqtalyp, tólemderin aýdarý júrgizilip jatyr.
«Bıyl jergilikti bıýdjetten tyńaıtqyshtardyń qunyn sýbsıdııalaýǵa 75,1 mln teńge, pestıtsıdter shyǵyny úshin 5,4 mln teńge, tuqym sharýashylyǵyn damytýǵa 19,9 mln teńge bólindi. Aýyl sharýashylyǵy taýaryn óndirýshilerge sý jetkizý shyǵynyna 345,6 mln teńge sýbsıdııa qarastyrylyp otyr», -dep málim etti Salaýat Óteǵulov.
Qazir Atyraý oblysynda «Qazsýshar» RMK-nyń teńgerimindegi 14 sýarý-sýlandyrý júıesi iske qosylǵan. Al eńbek kúshin qamtamasyz etý úshin Ózbekstan Respýblıkasynyń 800 adamyn jumysqa tartýǵa kvota bólingen. Osy kezge deıin sharýashylyqtarǵa sheteldik 562 adam jumysqa tartylǵan.
Eske sala ketelik, budan buryn Atyraý oblysynda 3 mlrd teńgelik jańa jylyjaıdyń birinshi kezeńi ashylǵanyn jazǵan edik.