Bıyl Atyraý oblysyna 50-ge jýyq etnıkalyq qazaq kóship kelgen

ATYRAÝ. QazAqparat –Atyraý oblysyna bıyl shet memleketterden 47 múshesi bar 35 otbasy kóship kelgen. Bul týraly oblystyq jumyspen qamtýdy úılestirý jáne áleýmettik baǵdarlamalar basqarmasynyń basshysy Serik Qamıdolla málim etti, dep habarlaıdy QazAqparat óńirlik kommýnıkatsııalar qyzmetine silteme jasap.

Serik Qamıdollanyń málimetinshe, munaıly óńirge qonys aýdarǵan etnıkalyq qazaqtardyń basym kópshiligi Ózbekstan Respýblıkasynan kelgen. Bul elden atajurtqa jetken 25 otbasynda 35 adam bar.

Al, Qytaı Halyq Respýblıkasynan - 8 otbasymen 10 adam, Ýkraına Respýblıkasynan - 2 otbasymen 2 adam kelgen.

«Elge kelgen qandastardyń oralman mártebesin berý týraly ótinishi halyqqa qyzmet kórsetý ortalyqtary arqyly tústi. Qujattary qaralyp, oralman mártebesin berý týraly sheshim qabyldandy. Qazir olardyń bári oblystaǵy qala men aýdandarǵa ornalasqan», - dedi Serik Qamıdolla.

Eske sala ketelik, buǵan deıin Atyraýda 1 shildege deıin 8 myńǵa jýyq adam ataýly áleýmettik kómek alǵanyn habarlap edik.