Bıyl astyqtyń jalpy jıyntyǵy 12 mln. tonna kóleminde bolady - AShM jaýapty hatshysy
ASTANA. 16 qazan. QazAqparat - Búginde bastapqy salmaqta 14 mln. tonnaǵa jýyq astyq bastyryldy. Bul týraly búgin egin oraǵy naýqany boıynsha selektorlyq tártiptegi Úkimet otyrysynda QR Aýyl sharýashylyǵy mınıstrliginiń jaýapty hatshysy Evgenıı Aman málim etti.
«Búginde respýblıkadaǵy astyq dándi-daqyldarynyń oraǵy aıaqtalýǵa jaqyndady. Atap aıtqanda, 15 mln. gektar egis oryldy. Nemese astyq egisteri aýdanynyń 99,7 paıyzy qamtyldy. Gektarynan 9,6 tsentner shyǵymdylyǵymen bastapqy salmaqta 14 mln. tonnaǵa jýyq astyq bastyryldy»,-dedi jaýapty hatshy.
Onyń sózine qaraǵanda, endi 52 myń gektar dándi-daqyldarynyń egistikterin orý qaldy. Negizinen bul Ońtústik óńirlerdegi júgeri men kúrish egisteri.
E. Amannyń aıtýynsha, óńdelgennen keıin astyqtyń jalpy jıyntyǵy 12 mln. tonna kóleminde bolady dep kútilýde. Atap aıtqanda, ótken jyldardaǵy 9,8 mln. tonna (2012 jylǵy 1 shildedegi jaǵdaı boıynsha) qaldyq astyqty eskergende jalpy astyq jıyntyǵy ishki qajettilikti qamtamasyz etýge, sondaı-aq, 8 mln. tonna kóleminde astyqty eksporttaýǵa múmkindik beredi.
