Bıyl astyqtyń 1 tonnasy qansha teńge bolady
«Astyq odaǵy retinde ishki naryqtaǵy astyqtyń 1 tonnasyn qosylǵan qun salyǵyn eseptegende 85-95 myń teńge bolady dep kútip otyrmyz. Bul óte mańyzdy», - dedi «Qazaqstannyń astyq odaǵy» saýda komıtetiniń basshysy Aleksandr Malov BAQ ókilderine arnalǵan dóńgelek ústel barysynda.
Onyń atap ótýinshe, bul baǵa naryq qatysýshylarynyń báriniń kóńilinen shyqpaýy múmkin.
«Bul baǵa aýyl sharýashylyǵy taýaryn óndirýshilerdiń bárin birdeı qanaǵattandyrmaýy múmkin. Óıtkeni, ózindik quny men óndiris kólemine qaraý qajet. Biraq, bul un men nannyń ishki naryqtaǵy baǵasyn qalyptastyrý turǵysynda Úkimetimizdiń kóńilinen shyǵatyn bolady. Sondyqtan da joǵary baǵa kútý óte qıyn bolar. Tómen de túspeýi tıis. Óıtkeni, qazirdiń ózinde aýyl sharýashylyǵy taýaryn óndirýshilerdiń ózindik quny sheginde turmyz. Sol sebepti óndirýshilerdiń tóńiregine barynsha shoǵyrlanyp, olardyń osy maýsymda barynsha jaqsy baǵa belgileýine múmkindik berý qajet», - dedi ol.
