Bıyl astyq túsimi 16 mln tonna kóleminde bolady - AShM

ASTANA. QazAqparat – Aýyl sharýashylyǵy mınıstri Erbol Qarashókeevtiń aıtýynsha, bıyl shilde-tamyz aılarynda batys jáne ońtústik óńirlerde jaýyn-shashyn qalypty normadan sál az bolady, dep habarlaıdy QazAqparat tilshisi.

«Byltyr astyqtyń túsimi jaman bolǵan joq - ortasha jyldyq kórsetkishten joǵary boldy. Bıylǵy astyq shyǵymynyń boljamy qandaı?» dep surady Premer-Mınıstr.

Mınıstrdiń aıtýynsha, naqty boljam aıtýǵa áli erte.

«Sharýalar egis egýdi qatań, ońtaıly merzimde aıaqtap jatyr. Topyraqta jınalǵan ylǵaldy saqtaý baǵytyndaǵy jumys ta meriziminde aıaqtaldy. «Qazgıdromettiń» bergen derekteri boıynsha, maýsym aıynda jaýyn-shashynnyń mólsheri respýblıkanyń basym bóliginde ortasha jyldyq normada bolady dep boljanyp otyr. Shilde-tamyz aıynda elimizdiń batys jáne ońtústik óńirlerinde normadan sál az bolady. Basqa óńirlerde jaýyn-shashyn boljamy - normaǵa sáıkes. Eginniń azdy-kópti dál boljamyn jasaý úshin óskinniń shyǵý merzimin kútý kerek. Qazir aldyn ala faktorlardy eskergendegi boljam mynadaı - bıdaı jalpy jınalatyn 16 mln tonna deńgeıinde boljanyp otyr. Astyq shyǵymy jaman bolmaıdy», - dedi Erbol Qarashókeev.