Bıyl astyq sapasy óte joǵary - QR AShM

ASTANA. QazAqparat - Bıyl astyq sapasy óte joǵary. Bul týraly búgin Úkimettiń selektorlyq rejimdegi otyrysynan keıin BAQ ókilderiniń saýalyna jaýap bergen QR Aýyl sharýashylyǵy birinshi vıtse-mınıstri Qaırat Aıtýǵanov málim etti, dep habarlaıdy QazAqparat.

Onyń aıtýynsha, jyl saıyn elimizde kúzgi jıyn-terimge 60 mlrd teńge qarjy bólinedi. Ótken jyly bul qarajat dıqandarǵa 10 paıyzben, al bıyldan bastap 6 paıyzben berildi.  Buǵan qosa, aǵymdaǵy jyly tuqym sapasy jaqsaryp, ónim túsimi 1-2 esege ulǵaıdy. Sonymen qatar egistik alqaptaryna sebiletin tyńaıtqysh kólemi de artta túsýde. Máselen, ótken jyly sharýalarǵa 260 myń tonna tyńaıtqysh jetkizilse, osy jyly olar 1,5 ese artyq satyp alyp otyr.

«Munyń barlyǵy astyq sapasyna áser  etýde. Qazirgi ýaqytta aımaqtardyń dereginshe, bastyrylǵan astyqtyń 76 paıyzynyń sapasy 3 sanatta bolýda. Ótken jyly ol jyldyń sońynda 44 paıyz bolǵan edi. Salystyratyn bolsaq, sapa 1,5-2 esege ózgerýde. Bıyl astyq sapasy óte joǵary», - dedi Qaırat Aıtýǵanov. 

Buǵan deıin habarlaǵanymyzdaı, respýblıka  boıynsha 11,6 mln gektar alqaptyń astyǵy jınalyp, 14,7 mln tonna dándi daqyl bastyryldy. Egin jınaý naýqany byltyrǵy jyldyń osy ýaqytymen  salystyrǵanda , 2,4 mln gektarǵa nemese 16 paıyzǵa artyq.