Bıyl astyq qar astynda qalmaıdy - vıtse-mınıstr Aıtýǵanov

ASTANA. QazAqparat - Bıyl astyq der ýaqytynda bastyrylyp, qar astynda qalmaıtyn bolady. Bul týraly búgin Úkimettiń selektorlyq rejimdegi otyrysynan keıin BAQ ókilderiniń saýalyna jaýap bergen QR Aýyl sharýashylyǵy birinshi vıtse-mınıstri Qaırat Aıtýǵanov aıtty, dep habarlaıdy QazAqparat.

«Oblys ákimderiniń aıtýynsha, dándi daqyldardy jınaý jumystary qyrkúıek aıynyń úshinshi onkúndiginde aıaqtalatyn bolady. Bizdiń boljamymyzsha, aǵymdaǵy jyly bıdaı men arpa qardyń astynda qalmaıdy», - dedi ol.

Sonymen qatar ol  kúzgi jıyn-terim respýblıkanyń  úsh óńirinde tolyqtaı aıaqtalǵandyǵyn atap ótti.

«Búgingi kúni Qazaqstannyń barlyq aımaqtarynda kúzgi jıyn-terim jumystary jalǵasýda. Respýblıka boıynsha masaqty daqyldardyń 76 paıyzy bastyryldy», - dedi Qaırat Aıtýǵanov.

Buǵan deıin habarlaǵanymyzdaı, respýblıka  boıynsha 11,6 mln gektar alqaptyń astyǵy jınalyp, 14,7 mln tonna dándi daqyl bastyryldy. Egin jınaý naýqany byltyrǵy jyldyń osy ýaqytymen salystyrǵanda , 2,4 mln gektarǵa nemese 16 paıyzǵa artyq.