Bıyl Astananyń Saryarqa aýdanynda jańa perzenthananyń qurylysy bastalady
ASTANA. QazAqparat – «Samuryq-Qazyna» ulttyq ál-aýqat qory» aktsıonerlik qoǵamynyń keıbir máseleleri týraly Úkimet qaýlysy ashyq talqyǵa shyqty, dep habarlaıdy QazAqparat tilshisi.
Qujatta jazylǵandaı, bıyl elordada salynýy múmkin perzenthananyń qurylysyn atalǵan qor qarjylandyrmaq.
«Ulttyq ál-aýqat qory týraly» QR Zańynyń 7-baby 2-tarmaǵynyń 15-2 tarmaqshasyna sáıkes QR Úkimeti qaýly etedi: «Samuryq-Qazyna» ulttyq ál-aýqat qory» aktsıonerlik qoǵamy QR zańnamasynda belgilengen tártippen 2023 jyly Astana qalasynyń Saryarqa aýdany 12-206 jáne 12-212 kósheleriniń qıylysynda salynatyn perınataldy ortalyqtyń qurylysyn qarjylandyrsyn», - delingen Ashyq NQA portalynda jarııalanǵan Úkimet qaýlysynda.
Tıisti qujat 21 sáýirge deıin kópshilik talqylaýda bolady. Keıin qol qoıý úshin Premer-Mınıstrge joldanady.
