Bıyl Astananyń botanıkalyq baǵyna 15 myń túp aǵash otyrǵyzylady
ASTANA. QazAqparat - Astanada botanıkalyq baq salynyp jatqany belgili. Al dál osy baqta otyrǵyzylatyn aǵashtardyń 90 paıyzy «Astana kógaldandyrý qurylysy» AQ-yna qarasty tálimbaqta ósirilip jatqanyn kópshilik bile bermeıtindigi anyq. Búgin Astana qalasy ákimdiginiń uıymdastyrýymen BAQ ókilderi sonaý 60-70-shi jyldary qurylǵan atalǵan tálimbaqtyń jumysymen tanysyp qaıtty.
«Tálimbaqtyń jalpy aýmaǵy 349 myń sharshy metrdi quraıdy. Bul jerde 600 myń túpten asatyn aǵashtyń 50-den astam túri otyrǵyzylǵan. Onyń ishinde bıik bolyp ósetin aǵashtarmen qatar tapal butalardyń da kóshetteri bar. Jalpy, bul tálimbaqtyń negizgi maqsaty - elordamyzdy aǵashtarmen abattandyrý. 60 adam jylyna 9 aı boıy úzdiksiz jumys isteıdi», - dedi BAQ ókilderine suhbat bergen «Astana kógaldandyrý qurylysy» AQ basqarma tóraǵasynyń orynbasary Bıbigúl Bektemisova.
Onyń aıtýynsha, bul tálimbaqta elimizdiń soltústik óńirlerine tán, jersinetin aǵashtar dáneginen ósirilip, birneshe jyldan keıin elorda kóshelerine otyrǵyzylady.
«Jalpy bizdiń 5 jyldyq josparymyz bar. 1 jylda elordaǵa 20 myń úlken aǵashtarmen qatar 200 myń túp tapal, topyraqsyz butalardy jiberip otyramyz. Al bıyl osy ýaqytqa deıingi rekordtyq kórsetkishke qol jetkizbekpiz. Jyl sońyna deıin qalaǵa 40 myń túp aǵash beremiz. Óıtkeni, Astanada úlken botanıkalyq baq salynýda. Jumysy osy jyldyń qyrkúıek aıynda bastalǵan botanıkalyq baqqa bıyldyń ózinde 15 myń túp aǵash otyrǵyzamyz. Jalpy, bul baqqa 40 myń túp aǵash otyrǵyzý kózdelgen. Joǵaryda atap ótkenimdeı, onyń 15 myńyn bıyl egemiz», - dedi ol.
Tálimbaq mamandarynyń aıtýynsha, Astananyń botanıkalyq baǵyn aǵashtarmen qamtamasyz etý jumystary qarqyndy júrgizilýde. Kúnine 12-den 40 túpke deıin 3 metrlik qaraǵaılar 25 KamAZ-ǵa tıelip, elordaǵa jónetilýde.
