Bıyl astanalyq UOS ardagerlerine qandaı kólemde syıaqy berilmek
NUR-SULTAN. QazAqparat – Bıyl 9 mamyr Jeńis kúni qarsańynda elordalyq ekinshi dúnıejúzilik soǵysqa qatysqan ardagerlerge 1 mln-nan astam syıaqy tólenbek. Bul týraly Nur-Sultan qalasy jumyspen qamtý jáne áleýmettik qorǵaý basqarmasy basshysynyń mindetin atqarýshy Ilıa Skýb málim etti, dep habarlaıdy QazAqparat tilshisi.
«Bıyl Jeńis kúnin merekeleýge baılanysty Uly Otan soǵysy ardagerlerine qosymsha áleýmettik kómek kórsetý týraly máslıhat sheshimderiniń jobalaryn qaraý usynylady. Osy jyly elordada 18 soǵys ardagerine 1 005 221 teńge kóleminde syıaqy tóleý josparlanyp otyr», - dedi Ilıa Skýb elorda máslıhatynyń otyrysynda.
Sóz alǵan qalalyq máslıhat depýtaty Baýyrjan Janqonaqov soǵys ardagerlerine beriletin syıaqy kóleminiń azdyǵyn alǵa tartty.
«Menińshe, ardagerlerge beriletin syıaqynyń kólemi az. Elorda boıynsha nebári 18 ardager qalǵan, soǵysty kórgen sońǵy jandar. Ardagerler 1 mln teńge ǵana emes, odan kóp syıaqyǵa laıyqty», - deıdi ol.
Depýttatyń bul oıyna qatysty qalalyq jumyspen qamtý jáne áleýmettik qorǵaý basqarmasy basshysynyń mindetin atqarýshy Ilıa Skýb pikir bildirdi.
«Astanalyq soǵys ardagerlerine Jeńis meıramy qarsańynda qarjylyq qoldaý jyl saıyn kórsetilip keledi. Syıaqynyń kólemin QR Eńbek jáne halyqty áleýmettik qorǵaý mınıstrligi belgilep otyr. Mınıstrliktiń belgileýi boıynsha elimizdiń barlyq óńirinde qoldaý birdeı deńgeıde kórsetilýi tıis», - dep jaýap qatty basqarma basshysy.
Buǵan deıin habarlaǵanymyzdaı elordada áleýmettik qoldaýǵa muqtaj jandarǵa beriletin tólemniń kólemin arttyrý usynyldy.
