Bıyl astanadaǵy Kóktal shaǵynaýdany qalaı ózgeredi

NUR-SULTAN. QazAqparat - Kóktal-1 turǵyn alabynyń Jumbaqtas kóshesiniń qasynda bos orynǵa fýtbol alańy, skeıt-aýmaq, vorkaýt-alańdar salynady, dep habarlaıdy QazAqparat.

Bul jaıynda Nur-Sultan qalasynyń ýrbanıstıka ortalyǵy málimet taratty.

Ortalyq ókilderiniń jergilikti turǵyndarmen ótken kezdesýlerinen keıin qoǵamdyq keńistikti abattandyrý jobasy bekitildi.

«Jobalaý aldynda elordalyq ýrbanıster saýalnama júrgizip, qala turǵyndarynyń tilekterin jınaıdy. Turǵyndarmen kezdesýlerde komandalyq dızaın-oıyn ótkiziledi. Nátıjesinde jańa qoǵamdyq keńistikti uıymdastyrýdyń eskızdik usynysy paıda bolady. Jobany bıyl iske asyrý josparlanyp otyr» deıdi ortalyq mamandary.

Atalǵan aımaq kishkentaı balalar oınyna jáne sporttyq oıyndarǵa arnalǵan dep bólingen. Birinshisinde átkenshekter, qumsalǵyshtar, oryndyqtar ornatylady.

Sport aımaǵynda – skeıt shaǵyn aımaǵy, 2 vorkaýt-alań jáne fýtbol alańy paıda bolady.

Tynysh demalys aımaqtary men tez tamaqtaný oryndary qarastyrylǵan. Aǵash otyrǵyzý da kózdelgen.

Ýrbanıstıka ortalyǵy osyndaı kezdesýlerdi apta saıyn qalanyń ár aýdanynda ótkizedi.

Aıta keteıik, bul jumys «Nur-Sultan - jaıly qala» master-jospary aıasynda júrgizilip jatyr.