Bıyl Astanada úshinshi jylý elektr ortalyǵy paıdalanýǵa beriledi

ASTANA. QazAqparat – Elordada jyl sońyna deıin taǵy bir jylý elektr ortalyǵy iske qosylady. Bul týraly Úkimet basshysy Álıhan Smaıylov málim etti, dep habarlaıdy QazAqparat tilshisi.

Jylý elektr ortalyqtaryn salý jospary týraly buǵan deıin de aıtyldy. Atap aıtqanda, 2023 jyldyń sońyna deıin Astanada úshinshi jylý elektr ortalyǵyn paıdalanýǵa berý josparlanyp otyr. Almatydaǵy JEO-2 jáne JEO-3-ti gazǵa aýystyrý jumystary júrip jatyr. Atalǵan isti «SamuryqEnergo» atqarady. Gazǵa aýysqannan keıin jylý ortalyǵynyń qýaty artyp, ekologııa máselesi de oń sheshimin tappaq, -

dedi Álıhan Smaıylov Úkimet otyrysynan keıin BAQ ókilderiniń saýalyna jaýap bere turyp.

Sondaı-aq,Úkimet basshysynyń aıtýynsha, Qyzylordada JEO salatyn ınvestor naqtylandy. Al, Túrkistan oblysyndaǵy jylý elektr ortalyǵy gazǵa kóshirilmek.

Atalǵan jobalar 2025 jylǵa deıin paıdalanýǵa berilýi tıis. Sondaı-aq, búginde Energetıka mınıstrligi Kókshetaýda JEO salý boıynsha tender ótkizip jatyr. Jospar boıynsha jańa ortalyq 2027 jyly paıdalanýǵa beriledi. Semeıde JEO salý boıynsha tehnıkalyq-ekonomıkalyq qujatty ázirleý jumysy bastaldy. Paıdalanýǵa 2027 jyly berilmek. Buǵan deıin tarıftiń ornyna ınvestıtsııa quıý baǵdarlamasy týraly aıtqan bolatynbyz. Baǵdarlama aldaǵy 5 jyl boıy qoldanysta bolady. Jalpy, barlyq ınfraqurylym boıynsha (elektr, sý, jylý) jelilerdiń tozý kórsetkishin 20 paıyzǵa azaıtýdy kózdep otyrmyz, -

deıdi Premer-Mınıstr.