Bıyl Astanada problemaly 30 úıdiń qurylysy aıaqtalmaq

ASTANA. QazAqparat – Astana ákimi Jeńis Qasymbek problemaly 30 turǵyn úı kesheniniń qurylysyn bıylǵy jyl sońyna deıin aıaqtaýdy tapsyrdy, dep habarlaıdy QazAqparat.

«Qurylysy uzaqqa sozylǵan birqatar ǵımaratqa bardym. Ózderińizge málim, ár nysannyń ótken tarıhy ártúrli, olardyń qurylysy birneshe jyldan beri bitpeı keledi. Máselen «Aqerke-2» turǵyn úı kesheniniń, tipti irgetasy da bolmaǵan edi, al «Pana» turǵyn úı kesheniniń qurylysy 8 jyl buryn bastalǵan.

Osyǵan deıin ákimdik qurylysy uzaqqa sozylǵan nysandardy aıaqtaý boıynsha úlken júıeli jumys júrgizgen bolatyn. Degenmen qalǵan nysandardy aıaqtaý mindeti de moınymyzda tur. Bul – 30-dan astam turǵyn úı kesheni. Onda myńdaǵan otbasy jyldar boıy baspanasyn kútip júr. Qurylysy uzaqqa sozylǵan árbir nysandy aıaqtaý boıynsha ózindik jospar bar. Bıyl osy nysandardy aıaqtaýdy tapsyrdym», - dep jazdy J.Qasymbek Instagram-da.
Sondaı-aq Astana basshysy qalany aralaý barysynda donor-nysandardyń qurylysymen tanysty. Olar uzaqqa sozylǵan nysandardyń qurylysyn aıaqtaý úshin salynǵan qarajattyń qaıtarymdylyǵyn qamtamasyz etedi. Qurylysy uzaqqa sozylǵan nysandardyń aıaqtalýy Memleket basshysynyń da baqylaýynda.

Foto: gov.kz