Bıyl Astanada Naýryz meıramyna arnalǵan negizgi is-sharalar «Qazaq eli» monýmentiniń aldynda ótedi

Bul týraly agenttik tilshisine bergen suhbatynda qalalyq Mádenıet basqarmasy bastyǵynyń orynbasary Qanat Tókesbaı málim etti.

Onyń aıtýynsha, meıram kúni «Qazaq eli» monýmentiniń aldyndaǵy alańǵa árbir aýdan ákimdigi on-onnan barlyǵy 30 kıiz úı tigedi. Olarda bıyl jyldaǵy dástúr boıynsha dastarhan jaıylmaıdy, onyń ornyna ulttyq qol óner sheberleriniń kórme-jármeńkesi ótedi. Sondyqtan barlyq kıiz úıdiń esigi kelýshiler úshin aıqara ashyq bolady. Onymen birge, elordalyqtar men qala qonaqtary Naýryz meıramynyń basty taǵamy - Naýryz kóje men baýyrsaqtan tegin aýyz tıe alady. Qalalyq meıramhanalar men naýbaıhanalar da óz ónimderin usynatyn bolady.

Meıram qalalyq teatrlar, tsırk jáne fılarmonııa ártisteriniń somdaýyndaǵy áserli teatrlandyrylǵan kórinisten bastalady. Odan keıin «Qazaq eli» monýmentiniń aldyna ornatylatyn sahnada qazaq estradasynyń juldyzdary óner kórsetse, «Shabyt» óner úıi men «Táýelsizdik» saraıynyń aldyna qoıylatyn kishigirim sahnalarda ulttyq sport oıyndarynan jarystar men kópshilikke arnalǵan basqa da sharalar uıymdastyrylady.

Merekelik sharalar osy kúni sondaı-aq «Jastar» saraıynyń aldynda ótedi. Al «Dýman» oıyn-saýyq ortalyǵyna kelýshiler «Naýryz -Dýman» atty qoıylymdy tamashalaı alady. Qala teatrlary óz kezeginde, óner súıer qaýymdy ózderiniń úzdik jáne jańa qoıylymdaryna shaqyrady. Mektepter men kitaphanalarda merekelik tanymdyq sharalar ótkiziledi.