Bıyl Astanada kezekte turǵandarǵa 677 jańa páter beriledi
ASTANA. QazAqparat - Bıyl Astanada baspana kezeginde turǵandarǵa 677 jańa páter beriledi, dep habarlaıdy QazAqparat qala ákimdiginiń saıtyna silteme jasap.
«Memlekettik turǵyn úı qorynan beriletin páterdi UOS múgedek qatysýshylary, jetim balalar, memlekettik qyzmetkerler men halyqtyń áleýmettik osal toptary alady», - delingen habarlamada.
Astana ákimdigi júrgizgen qurylymdaý sheńberinde kommýnaldyq turǵyn úı qorynan beriletin úıdiń fýnktsııasy Jumyspen qamtý jáne áleýmettik qorǵaý basqarmasyna berildi.
Atalmysh vedomstvonyń mindetin atqarýshy Artem Ábildınovtyń aıtýynsha, qaladaǵy turǵyn úı ahýalynyń monıtorıngin jaqsartý maqsatynda kommýnaldyq memlekettik mekeme - Astana ákimdiginiń turǵyn úı qory quryldy.
«Qor ıesiz qalǵan úı-jaılardy anyqtaýmen aınalysady. Jalǵa berýshilerdiń mindettemelerin durys oryndaýyna monıtorıng jasaıdy. Bul - turǵyn úıdiń jalǵa alýdyń tólemin jasaý jáne turǵyn úı maqsatyna saı paıdalanýǵa qatysty. Sonymen qatar baspanaǵa muqtajdar tizimindegi turǵyndardyń ınterıorlyq tizimin jasaıdy, daıyn páterlerdiń turǵyndar qonystanýyna ázirligin zerdeleıdi», - dep túsindirdi A. Ábildınov.
Jyldyń sońyna deıin myńnan astam páter paıdalanýǵa beriledi dep josparlanýda.
«Turǵyn úı qurylys jınaq bankiniń salymshylary úshin jalpy alańy 22,58 myń sharshy metr 364 páter, «Qazaqstan ıpotekalyq kompanııasy» ıpotekalyq uıymy» AQ baspanasy» baǵdarlamasy boıynsha 80 páter jáne kezektegiler úshin jalpy alańy 38 myń sharshy metr 677 páter beriledi», - dep málimdedi A. Ábildınov.
