Bıyl Astanada eki myńǵa jýyq bozbala áskerge attanady

ASTANA. QazAqparat - Osy jyly Astanadan shamamen 1,8 myń bozbala áskerge shaqyrtylady Áskerge shaqyrylýshylarǵa qatań talaptar qoıylady, dep habarlaıdy Astana qalasy ákimdiginiń resmı saıtyna silteme jasap.

Qalalyq qorǵanys isteri departamentinde belgili bolǵandaı, 2019 jyly merzimdi áskerı qyzmetke shamamen 1,8 myń jas astanalyq shaqyrylady.

«Qala halqy sanynyń artýyna baılanysty ásker qataryna shaqyrylatyndar qatary jyl saıyn ósýde. Osy jyly áskerge shaqyrylatyn sarbazdardyń sanyn ótken jylmen salystyrǵanda 20% kóbeıtý kózdelgen», - dep habarlady vedomstvodan.

Jyl saıyn Qazaqstanda 18-27 jas aralyǵyndaǵy barlyq jas jigitter áskerge shaqyrylady. Áskerı qyzmet jáne Qazaqstan Respýblıkasyn qorǵaý - ár azamattyń paryzy men mindeti. Alaıda bozbalanyń áskerden ýaqytsha jáne turaqty negizde bosatyla alatyn birqatar jaǵdaılary bar. Osy jyly 1992-2001 jyly týǵan jigitter ásker qataryna shaqyrylady.

Ótken jylǵy statıstıkaǵa qaraǵanda, ásker qataryna alynyp jatqandardyń jasy 18-23 aralyǵynda. Tehnıkalyq bilimi jáne V, S sanatyndaǵy júrgizýshi kýáligi bar jigitterge basymdyq beriledi. Áskerge attanatyndardyń birinshi legi shamamen 10 naýryzda attanady. Olar UQK-niń Shekara qyzmeti jáne Memlekettik kúzet qyzmeti áskerı bólimderinde boryshyn óteıdi. Áskerge shaqyrylýshylardyń kelesi legi - Qarýly Kúshter men Ulttyq ulanǵa barady.

«Astanaǵa shaqyrylǵan jigitter ońtústik, batys jáne shyǵys óńirlerindegi Áýe qorǵanysy kúshterinde, oqý bólimshelerinde, arnaıy maqsattaǵy bólimderde ásker qatarynda bolady. Aıta keteıik, eksterrıtorııalyq tártipke saı áskerge shaqyrylǵan azamat óziniń týǵan oblysynda áskerı boryshyn óteı almaıdy. Mindetti túrde basqa aımaqqa jóneltiledi», - dep málimdedi qalalyq qorǵanys isteri jónindegi departamentten.

Áskerge shaqyrylýshylarǵa qoıylatyn talaptar: densaýlyǵy óte jaqsy, bilimi ortadan tómen emes (joǵary tehnıkalyq mamandyǵy quptalady), psıhologııalyq turaqtylyq, qylmystyq jáne ákimshilik jaýapkershilikke tartylmaýy kerek.