Bıyl astanada 6 mıllıonǵa jýyq gúl, 30 myń aǵash otyrǵyzylady
NUR-SULTAN. QazAqparat - Bıyl Nur-Sultan qalasynda 6 mıllıonǵa jýyq gúl, 30 myń aǵash otyrǵyzylady. Jumystar barlyq aýdanda júrgiziletin bolady, dep habarlaıdy QazAqparat elorda ákimdigine silteme jasap.
«Bizdiń kásiporyn qyzmetkerleri óz isine degen zor yqylaspen kúni-túni jumys isteıdi. Olarǵa alǵysym sheksiz. Bul jumys árkimniń qolynan kelmeıdi. Óıtkeni gúl otyrǵyzý – zergerlik jumys sekildi. Qalany kógaldandyrý men gúl otyrǵyzý úshin jan-tánimizben jumys isteımiz. Mamandarymyz qala turǵyndaryn qýantyp, jaqsy kóńil-kúı syılaý úshin eńbek etýde», - dedi «Astana – Zelenstroı» JShS bas dırektorynyń orynbasary Bıbigúl Bektemisova.
Kún saıyn 130 maman jumyldyrylyp, sanıtarlyq normalardy qatań saqtaı otyryp jumys jasaýda.
«Meniń basty mindetim - sýarý jáne gúlderdi kútý. Jumys qıyn, úlken shydamdylyqty qajet etedi», - dedi «Astana – Zelenstroı» JShS qyzmetkeri Aıgúl Jaılaýbaeva.
«Bıyl úıeńki, jóke, emen, sondaı-aq mamyrgúl, aqtal syndy buta aǵashtarǵa basymdyq beremiz. Mamyq shashatyn terek túrin otyrǵyzbaımyz», – dedi Nur-Sultan qalasy ákiminiń orynbasary Altynbek Qaısaǵalıev.
Elordany kógaldandyrý jáne abattandyrý maqsatynda bıyl 30 myń aǵash otyrǵyzylady.
