Bıyl Astanada 55 jyly aıaldama ashylady
ASTANA. QazAqparat - Astanada ótken jyly da birqatar jyly aıaladama ashylǵan edi. Bıyl taǵy 55-i qoldanysqa beriledi. Jańa aıaldamalar salynýyn salynǵanmen, áli paıdalanýǵa berilgen joq, dep habarlaıdy «Habar 24».
Astanalyqtar úshin jyly aıaldamalar kerek-aq. Biraq qalanyń keıbir ortalyq kósheleri bolmasa, mundaı oryndar ázirge neken-saıaq. Jalpy bary - 27.
Bıyl taǵy 55-i ashylady. Quny da arzan emes. Qurylys jumystary, qural-jabdyqtar baǵasy, ony ornatýdy esepke alǵanda - 12 mln teńge. Qazirgi ýaqytta pavılondardy belgili bir mekemeniń qaramaǵyna berý jumystary júrip jatyr.
«Bul aıaldamalar búgingi kúnge jobalyq-smetalyq jobalarǵa baılanysty elektr qýatyna qosylý jumystary júrgizilip jatyr. Elektr qýatyna qosylyp, barlyq qondyrǵylardy ornatqan soń, bul aıaldamalardyń barlyǵy ashylyp, halyqqa qyzmet kórsete bastaıdy», - deıdi jolaýshylar kóligi basqarmasy jol júrý qaýipsizdigi bóliminiń basshysy Rýslan Ábdýálıev.
Bul - «Aqyldy qala» jobasyn júzege asyrýdy bir baǵyty. Jyly aıaldamalar ortalyqtandyrylǵan júıe arqyly beınebaqylaýmen qadaǵalanady. Quqyq buzǵan azamattar kózge túsip jatsa, jaqyn jerdegi ishki ister bólimine habar beriledi.
Joba jetekshileriniń aıtýynsha, bul aıaldamalardyń jolaýshylardyń jaılylyǵy úshin barlyq jaǵdaı jasalǵan.
«Jańa aıaldamalardyń artyqshylyǵy kóp. Barlyǵy «Aqyldy qala» júıesine qosylǵan. Máselen, aýa temperatýrasy -10 gradýsqa tómendegen jaǵdaıda jylý júıesi avtomatty túrde qosylady. Al synap baǵanasy 20 gradýstan kóterilse, jeldetkish jumys isteı bastaıdy. Saǵat túngi birden keıin jylý, jaryq óshiriledi. Bul turǵylyqty meken jaıy joq adamdardyń aıaldamalardy qonyp shyǵatyn orynǵa aınaldyrmas úshin de jasaldy» , - deıdi joba jetekshisi Anton Bystrımovıch.
Qurylysqa soqqyǵa tózimdi materıaldar qoldanylǵan. Biraq soǵa berse, bári synady. Sondyqtan turǵyndardyń mádenıetti bolǵany abzal.
Aıta keteıik, bıýdjet qarajatyna salynǵan 55 jyly aıaldamadan bólek, memlekettik jáne jekemenshik áriptestik esebinen taǵy 10-y qoıylady. Jyly pavılondar emhana, aýrýhana, mektepter, vokzal sııaqty halyq kóp júretin jerlerde ornatylyp jatyr. Osy aıdyń 15-ine deıin qoldanysqa berilmek.
