Bıyl Astanada 5 jalpy bilim beretin mektep salynady
ASTANA. QazAqparat - 2015 jyly Astanada 5 jalpy bilim beretin mektep salynady, dep habarlaıdy astana.gov.kz.
Elordada 88 jalpy bilim beretin mektep jumys isteıdi, onda 105 myńnan astam bala oqıdy. Ótken jyly bul kórsetkish 94 myńǵa jýyq oqýshyny quraǵan. Jalpy bilim beretin 88 mekteptiń ishinde 77-si memlekettik (102 myń bala) jáne 11 memlekettik emes mekeme.
Elordada múmkindigi shekteýli balalarǵa arnalǵan bilim berý mekemeleri de bar. Erekshe oqytý qajettiligi bar balalarǵa psıhologııalyq-ádistemelik-pedagogıkalyq korrektsııalyq qoldaý kórsetetin 30 arnaıy kabınet pen uıym qyzmet etedi. Múmkindigi shekteýli balalardyń elektrondy bazasy qurylǵan. Qazirgi kezde Bilim basqarmasynyń málimetter bazasyna 1805 bala engizildi.
Aıta keteıik, búgingi tańda mektepterde tárbıeleý protsesin uıymdastyrýdy jetildirý boıynsha jumystar qolǵa alyndy. Atap aıtqanda, is-sharalar, kórmeler, merekeler men sporttyq-buqaralyq sharalar ótkizilýde.
Búginde mektepterdegi oryn tapshylyǵy 1 864 quraıdy, eki aýysymdyq oqýdy qosa eseptegende oqýshylar sany 7 mektepte jobalyq qýattylyqtan artyq bolyp otyr. Mektep jasyndaǵy balalar sanynyń ósýine baılanysty 2015 jyly 4800 oryndyq 5 jalpy bilim beretin mekteptiń qurylysyn bastaý kózdelgen:
1. Qartaly jáne Oqjetpes kósheleriniń qıylysynda 1200 oryndyq mektep;
2. Oqjetpes jáne Bókeev kósheleriniń qıylysynda 1200 oryndyq mektep;
3. Qaldaıaqov - Nájimedenov kósheleriniń qıylysynda (900 oryn);
4. Nura-Esil kanalynda 1200 oryndyq mektep;
5. Qorǵaljyn tas joly (900 oryn).
Astana qalasynyń Ákimdigi Ulttyq qordan bólingen qarjy esebinen №16 mektepke qosymsha ǵımarat, sondaı-aq, mektepke deıingi mekemelerde oryn tapshylyǵyn azaıtý úshin 7 balabaqshanyń qurylysyn júrgizýdi josparlap otyr.
