Bıyl Astanada 5 mektep pen 4 balabaqsha salynady
ASTANA. QazAqparat - 2014 jyly Astana qalasynyń Esil aýdanynda 5 mektep pen 4 balabaqsha salynady. Bul týraly Esil aýdany ákiminiń apparatynan habarlady, dep jazady elorda ákimdiginiń resmı saıtynda.
«Ústimizdegi jyly árqaısysy 1200 oryndyq 5 mekteptiń jáne jalpy jobalyq qýattylyǵy 920 oryn bolatyn 4 balabaqshanyń qurylysyn aıaqtap, paıdalanýǵa berý josparlanyp otyr. Mektepter №19 kósheden oń baǵytta, Túrkistan, Kereı han-Jánibek han jáne Orynbor kósheleriniń shekarasynda, Eńbekshiler aýdanynda, «Komsomolskıı» turǵyn alabynda, Syǵanaq kóshesiniń ońtústiginde salynady. Al, balabaqshalar Almaty-Aqmeshit kósheleriniń qıylysy men Saýran jáne №24 kósheleriniń qıylysynda, Túrkistan-Orynbor - №25 jáne №26 kósheleriniń qıylysynda, Túrkistan, Kereı-Jánibek han jáne Orynbor kósheleriniń aýdanynda boı kóteredi», - delingen habarlamada.
2013 jyly elordada jalpy 760 oryndyq 3 balabaqsha jáne 1200 oryndyq 1 mektep paıdalanýǵa berilgen.
