Bıyl Astanada 340,9 mln. teńge somasyndaǵy eńbekaqy bereshegi qaıtaryldy - Prokýratýra
ASTANA. 30 naýryz. QazAqparat /Jasulan Amanbaıuly/ - Jyl basynan beri elordada prokýrorlyq yqpal etýdiń arqasynda 340,9 mln. teńge somasyndaǵy eńbekaqy bereshegi qaıtaryldy.
Bul týraly búgin Astana qalasynyń prokýratýrasynda eńbek zańnamasynyń saqtalýy taqyrybyna arnalǵan alqa májilisinde málim etildi.
Qalalyq prokýratýranyń birinshi basqarma tóraǵasy Asylbek Ábdiraıymovtyń aıtýynsha, jyl basynan beri elordada prokýrorlyq yqpal etýdiń arqasynda kásiporyndardyń jumysshylar aldyndaǵy 340,9 mln. teńge somasyndaǵy eńbekaqy bereshegi qaıtaryldy. Jyl basynda 38 kásiporynmen ótelmeı jatqan jalaqynyń kólemi 380,8 mln. teńge bolǵanyn atap ótken jón.
Baspasóz qyzmetiniń alqa barysynda taratqan málimetteri boıynsha, qazirgi ýaqytta Astanada 94,9 mln. teńge jalaqy qaryzdary bar. Qaladaǵy 17 kásiporyn 946 jumysshyǵa eńbekaqylaryn ótemegen bolyp otyr.
Sondaı-aq baıandamashynyń atap ketkenindeı, prokýratýra organdary osy salada 12 qylmystyq is qozǵap, 6 iri kásiporynnyń óz jumyskerleri aldyndaǵy 100 mln. teńge somasyndaǵy qaryzdaryn tolyq óteýlerine septigin tıgizgen.
Onyń aıtýynsha, eńbek salasyndaǵy ahýalǵa jasalynǵan taldaý barysynda elimizdegi jalaqy boıynsha bereshektiń basym bóligi «Qýat» korporatsııasyna tıesili bolǵan. Búgingi tańda kásiporynnyń Astana aýmaǵynda ornalasqan 6 úlestes kompanııanyń jumysshylar aldyndaǵy bereshegi 200 mln. teńgeni quraǵan bolatyn.
Qazirgi ýaqytta bereshektiń negizgi bóligi ótelip, onyń jumysshylar aldyndaǵy boryshy 7 mln. teńgege deıin qysqardy.
