Bıyl astanada 300-den astam otbasy apatty jaǵdaıdaǵy úıden kóshiriledi

NUR-SULTAN. QazAqparat - Nur-Sultan qalasynyń ákimi Altaı Kólginov apatty úılerdegi otbasylardy kóshirý máselesi jaıly aıtty, dep habarlaıdy QazAqparat.

«Apta saıyn azamattardy qabyldap turamyz. Taǵy 12 otbasyn qabyldadym, al jyl basynan beri – 60 otbasy (2021 jyly – 1,5 myń turǵyn). Kezdesý barysynda áleýmettik baǵyttarǵa qatysty negizgi problemalar da, sol sııaqty sheshimin talap etetin naqty máseleler de kóteriledi: jumysqa ornalastyrý, jobalardy iske asyrý boıynsha kómek kórsetý jáne t.b.

Búgin azamattardy qabyldaý barysynda apatty jaǵdaıda turǵan úılerdi buzý máselesi kóterildi. Osyǵan qatysty qysqasha toqtalyp óteıin. Máselen, búginge deıin biz Y.Dúkenuly, 21, Ýgolnaıa, 12a (qazir Ál-Farabı, 27) jáne basqa mekenjaılarda ornalasqan apatty úılerge baryp, jaǵdaıdy kórdik. Bul úılerdiń tozyǵy jetken, sýmen, elektrmen jabdyqtaýda problemalary bar, shatyrynan sý aǵyp tur» dep jazdy Altaı Kólginov Instagram paraqshasynda.

Bıyl apatty jaǵdaıda turǵan úılerden 300-den astam otbasyn kóshirý josparlanǵan.

Sońǵy úsh jylda tozyǵy jetken úılerden 700-ge jýyq otbasy kóshti.

«Turǵyn úı jaǵdaıyn jaqsartý úshin TK-lerdi (turǵyn úı kesheni) jóndeý, lıftilerdi aýystyrý, jeńildikpen beriletin áleýmettik turǵyn úı salý, qurylysy uzaqqa sozylǵan nysandardy aıaqtaý boıynsha jumys júrip jatyr», - deıdi elorda ákimi.