Bıyl Astanada 3 kókónis qoımasy iske qosylady
ASTANA. QazAqparat - Bıyl Astanada syıymdylyǵy 14 500 tonna bolatyn 3 kókónis saqtaý qoımasy paıdalanýǵa beriledi. Taǵy tórteýiniń qurylysy qarqyndy júrip jatyr, dep jazady astana.gov.kz.
Qazir qalada 5 kókónis qoımasy jumys istep tur. Olardyń jalpy syıymdylyǵy - 21850 tonna. Al qalanyń qajetettiligi 60 myń tonnany quraıdy.
«Qazir 7 kókónis qoımasynyń qurylysy júrip jatyr. Olardyń syıymdylyǵy - 22146 tonna. Olardyń úsheýi bıyl, qalǵany kezeń-kezeńimen tapsyrylady. Kelesi jyly taǵy 5 kókónis qoımasynyń jobasy jasalýda. Ol qosymsha 29 000 tonnadaı bolady. Osylaısha qala qajettiligin 2017 jylǵa deıin tolyqtaı óteımiz degen nıettemiz», - Astana qalasy aýyl sharýashylyǵy basqarmasynyń basshysy mindetin atqarýshy Gúlmıra Ermoldına.
Paıdalanýǵa beriletin taǵy bir qoımada 7 myń tonna kókónis pen tsıtrýsty jemister saqtalady. Aýdany 2 myń ga bolatyn qoımanyń qurylysy qazan aıynyń sońyna deıin aıaqtalýy tıis. Munda jemis pen kókónis saqtaýdyń babyn biletin tehnologtar jumys istemek. Al halyqqa tıimdi bolýy úshin qoıma janynan saýda ortalyǵyn turǵyzý da qarastyrylyp jatyr.
Ákimdik tarapynan jańa nysandardy elektr jelisine qosý, óndiristik ınfraqurylym men jol máselesin sheshýge kómektesý máseleleri qarastyrylyp jatyr.
