Bıyl astanada 12 mekteptiń qurylysy bitedi
NUR-SULTAN. QazAqparat – Elordaa ákimdigi jyl sońyna deıin 40 myń oryndyq 12 mektepti qoldanysqa berýdi josparlap otyr, dep habarlaıdy QazAqparat tilshisi.
Bul týraly Nur-Sultan qalasynyń ákimdigi redaktsııanyń saýalyna bergen jaýabynda aıtty.
«2021 jyldyń sońyna deıin 40 myńnan astam oqýshyǵa arnalǵan 12 mektepti paıdalanýǵa berý josparlanýda», - dep jazylǵan jaýapta.
Sondaı-aq, ákimdik ókilderi óndiristik jumystar kestesi boıynsha 4 dene shynyqtyrý-saýyqtyrý nysanynyń qurylysy júrip jatqanyn atap ótti.
Jaýapta «Baıqońyr» jáne «Saryarqa» aýdandaryndaǵy, Kóktal turǵyn massıvindegi dene shynyqtyrý-saýyqtyrý keshenderiniń qurylysy tamyz aıyna deıin bitýi tıis ekeni de aıtylǵan.
Al jeltoqsan aıynda «Almaty» jáne «Esil» aýdandaryy men «Jeleznodorojnyı» jáne Ilınka turǵyn massıvinde osyndaı nysandardy qoldanysqa berý josparlanǵan.
