Bıyl Astanada 1-synypqa baratyn oqýshylar sany rekordqa jetpek
ASTANA. QazAqparat - Astanalyq mektepterdiń 5 myń túleginiń ornyna jańa oqý jylynda birinshi synypqa shamamen 22 myń oqýshy keledi, dep habarlady qala ákimdiginiń medıa ortalyǵy .
Qalalyq bilim berý basshysynyń mindetin atqarýshy Anýar Janǵozınniń, sózine qaraǵanda, ótken oqý jyly Astananyń mektepterinde 9 588 orynǵa jetispeýshilik baıqalǵan, bıyl bul kórsetkish 17 myńdy quraýy múmkin.
«1-synypqa keletin oqýshylardyń sany kúrt ósýine (boljam boıynsha 22 myń oqýshy) jáne kóshi-qon máselesine (4 500 oqýshy) baılanysty 2017-2018 oqý jylynda boljam boıynsha 17 myń orynǵa jetispeýshilik sezilýi múmkin», - dedi A. Janǵozın.
Oǵan qosa Astana ákimdigimen mektepter men baqshalarda oryn jetispeýshiligi máselesi keshendi túrde sheshilýde. Osylaısha 2017-2018 oqý jyly 2 600 orynǵa shaqtalǵan japsarlas salynǵan 5 mektepti paıdalanýǵa berý josparlanǵan. Sondaı-aq elordada jyl saıyn kem degende 10 jańa mektep salynatyn bolady.
«6 mekteptiń qurylysy bastaldy, jyl sońyna deıin 4 bilim ordasyn salý josparlanýda. Jalpy alǵanda 11 myń orynǵa arnalǵan 10 mektep salynady, ol 2018-2019 jyldary paıdalanýǵa beriledi. Oǵan qosa 13 mekteptiń jobasyn iske asyrý boıynsha jumys bastalyp ketti. Bizdiń josparymyz - jyl saıyn 13-14 mektepti paıdalanýǵa berý», - dedi A. Janǵozın.
Qazirgi tańda elordada 95 jalpy bilim beretin mektep ordasy bar, onda 130 542 oqýshy bilim alady. Sonymen birge balalardyń kóbisi memlekettik mektepterge barady. 84 bilim ordasynda 127 myńǵa jýyq oqýshy bilim alady. 11 jeke mektepte 3 625 oqýshy oqıdy. Oryn jetispeýshilik qalanyń 27 mektebinde saqtaldy (3 mektepte sabaq úsh aýysymmen ótken).
