Bıyl Astanada 1,5 mln sharshy metrge jýyq turǵyn úı paıdalanýǵa berildi

ASTANA. QazAqparat - Búgin qalalyq ákimdikte elorda basshysy Ádilbek Jaqsybekovtyń qatysýymen ótken apparat otyrysynda 2015 jyldyń basty qorytyndylary shyǵaryldy. Otyrys barysynda qalanyń ekonomıkalyq damýyn sıpattaıtyn negizgi ındıkatorlar men kórsetkishterdiń artqany atap kórsetildi. Bul óńirler arasynda kósh bastaýǵa múmkindik berdi. Bul týraly qalalyq ákimdiktiń baspasóz qyzmetinen habarlady.

Birinshi jartyjyldyqtyń qorytyndysy boıynsha ǵana jalpy óńirlik ónim ótken jyldyń sáıkes merzimimen salystyrǵanda 4,3% ulǵaıdy. Onyń respýblıkalyq kólemdegi úlesi 10,8 % qurady. 2015 jyly negizgi kapıtalǵa tartylǵan ınvestıtsııalar 16% artty. Ónerkásiptik óndiris kólemi 5,4% ósip, 273,9 mlrd. teńgeni qurady, buǵan óńdeýshi ónerkásipte ónim óndirýdiń 5,7% ulǵaıýy septigintıgizdi. Tórt iri ónerkásiptik zaýyt ashyldy. 2015 jyly elordada 1,5 mıllıon sharshy metrge jýyq turǵyn úı paıdalanýǵa berildi, bul 2014 jylǵy kórsetkishterge qaraǵanda 1,6 ese artyq. Tórt mekteptiń, jeti balabaqshanyń jáne bes densaýlyq saqtaý nysanynyń qurylysy aıaqtaldy. 18 myńnan astam jańa jumys orny ashyldy. Jumyssyzdyq deńgeıi4,6% deıin tómendedi. Bul elimizdegi úzdik kórsetkish. Sonymen qatar, salyq salý bazasynyń ulǵaıýy, shaǵyn jáne orta bıznes salasynyń damýy jáne t.b. atap kórsetildi. «Aldaǵy jyly qalanyń damý qarqynyn toqtatpaýǵa kúsh salý kerek», - dedi Astana ákimi Ádilbek Jaqsybekov. Qala basshysy bıýdjettik qarjylandyrýdyń qysqartylýyna qaramastan mindetterdi bıýdjetten tys qarjy kózderi arqyly sheship, barlyq kórsetkishterdi saqtap qalý kerek ekendigin jetkizdi. «Investıtsııalar tartý jáne kásipkerlerge jaǵdaı jasaý - keler jyldyń basty mindeti», -dedi elorda ákimi. Bul rette tek sheteldik ınvestorlarmen ǵana emes, sondaı-aq, eń aldymen otandyq kásipkerlermen jumys isteý kerek. Abattandyrý, tirshilikti qamtamasyz etý jáne qoǵamdyq qaýipsizdik máseleleri basty kún saıynǵy mindetter bolyp qalady, dedi Á. Jaqsybekov. Otyrys sońynda qala ákimi barlyq qalalyq qyzmetterdiń jumyskerlerin kele jatqan Jańa jylmen quttyqtap, Astana men onyń turǵyndarynyń ıgiligi úshin atqarǵan jumystarynda tabys tiledi.