Bıyl Astana-Qaraǵandy tas joly tolyǵymen aıaqtalady

ASTANA. QazAqparat - Aǵymdaǵy jyly «Ortalyq-Ońtústik» dálizi boıyndaǵy Astanadan Qaraǵandyǵa deıingi avtomobıl jolynyń barlyq ýchaskesinde jol salý jumystary aıaqtalyp, kólik qozǵalysyna tolyqtaı ashylady. Bul týraly «QazAvtoJol» ulttyq kompanııasynyń baspasóz qyzmetinen málim etti, dep habarlaıdy QazAqparat.

Elimizdiń ınfraqurylymyn damytýǵa baǵyttalǵan «Nur jol» memlekettik baǵdarlamasy aıasynda jalpy uzyndyǵy 1291 shaqyrymdy quraıtyn Astana-Qaraǵandy-Balqash-Almaty baǵdary boıynsha «Ortalyq-Ońtústik» jobasy júzege asyrylýda. 

«Uzyndyǵy 171 shaqyrymdy quraıtyn Astana-Temirtaý ýchaskesiniń qazirgi ýaqytta 105 shaqyrymy paıdalanýǵa berilgen. Buǵan qosa, tas jol boıynda qaýipsizdik pen úzdiksiz qozǵalys qamtamasyz etilgen. Qalǵan 66 shaqyrymda joldyń ınjenerlik ornalastyrý jumystary júrgizilýde. Tolyqtaı aıaqtaý 2017 jyldyń 4  toqsanynda kózdelgen», - delingen kompanııa aqparatynda.

Aǵymdaǵy jyly Temirtaý-Qaraǵandy ýchaskesinde 14 shaqyrymdyq avtomobıl jolyn jańǵyrtý jumystary bastalǵan. Osy jyldyń sońyna qaraı Astana-Qaraǵandy joly kólik qozǵalysyna ashylady. Biraq, jumystardy tolyqtaı aıaqtaý 2018 jylǵa josparlanyp otyr. Munan bólek, «Qaraǵandy qalasyn soltústik-shyǵys aınalma joly» ýchaskesinde jumystar bastalyp, 47 shaqyrym avtomobıl jolyn 4 jolaqty kólik qozǵalysyna, 1-b tehnıkalyq sanatyna sáıkestendirip jańǵyrtý josparlanǵan.

«Qazirgi ýaqytta «QazAvtoJol» kompanııasynyń bólimsheleri uzyndyǵy 228 shaqyrymdy quraıtyn Býrylbaıtal-Kúrti avtojoly ýchaskesin jańǵyrtý jumystaryn bastady. Joba halyqaralyq qarjy ınstıtýttarynyń qarajaty esebinen atap aıtqanda 143 shaqyrymy Eýropalyq qaıta qurý jáne damý banki, 85 shaqyrymy Halyqaralyq qaıta qurý jánen damý banki esebinen júzege asyrylady. Atalǵan ýchaskedegi jumystardy tolyq aıaqtaý 2020 jylǵa josparlanǵan», - dep habarlady kompanııadan.