Bıyl Astana qalasy ákiminiń bilim granttaryn 40 jas ıemdendi
STANA. Qyrkúıektiń 22-si. QazAqparat /Gúlmıra Álıakparova/ - Búgin Astana qalasynyń ákimdiginde orta bilim mektepteriniń 40 túlegine qala basshysynyń bilim granttary tabys etildi.
Granttardy saltanatty túrde qala ákiminiń orynbasary Aıda Balaeva tapsyrdy.
Onyń málim etkenindeı, Astana ákiminiń granttary áleýmettik qoldaýdy qajet etetin, ıaǵnı tul jetimderge, múgedekterge, balalar úıleriniń túlekterine, kópbalaly otbasynan shyqqan jáne ata-ananyń qamqorlyǵynsyz qalǵan balalarǵa 2004 jyldan bastap berilip keledi.
«Bilim granttary ekonomıkanyń eń kerekti salalary ásirese, bilim, medıtsına jáne tehnıkalyq mamandyqtarǵa berildi. Ákimniń granty boıynsha búgingi kúni 123 bala bilim alyp jatyr, onyń 19-y oqýlaryn bıyl aıaqtady», - dep atap ótti ol.
Bıylǵy jyly, qalada jumys istep turǵan bes joǵary oqý ornynda atap aıtqanda, L.Gýmılev atyndaǵy Eýrazııa ulttyq ýnıversıteti, S.Seıfýllın atyndaǵy Qazaq agrotehnıkalyq ýnıversıteti, Qazaq ekonomıka, qarjy jáne halyqaralyq saýda ýnıversıteti, Qazaq memlekettik medıtsına akademııasy men Qazaq gýmanıtarlyq zań ýnıversıtetinde tegin bilim alý múmkindikterine 40 bala ıe boldy. Bul maqsatqa jergilikti bıýdjetten 36,4 mıllıon teńge qarajat bólindi.
