Bıyl ásker qataryna úsh myń almatylyq jiberiledi

ALMATY. QazAqparat – Bıyl merzimdi áskerı boryshyn óteýge Almatydan 3 myń shaqyrylýshy jiberiledi. Bul týraly óńirlik kommýnıkatsııalar qyzmeti brıfıngisinde Almaty qalasy Almaly aýdany Qorǵanys isteri jónindegi basqarmasynyń bastyǵy polkovnık Aıdar Músirepov aıtty, dep habarlaıdy QazAqparat tilshisi.

Spıkerdiń aıtýynsha, qazirgi tańda Almatydan 760 er azamat merzimdi áskerı boryshyn óteýge attanǵan.

«Búgingi kúni Almatyda QR Áskerı qyzmet jáne áskerı qyzmetshilerdiń mártebesi týraly zań men Prezıdent jarlyǵyna sáıkes kóktemgi áskerge shaqyrý naýqany júrip jatyr. Bıyl Almaty qalasynan 18-27 jas arasyndaǵy 3 myń azamat áskerı boryshyn óteýge jiberiledi. Olar QR Qarýly kúshteri, UQK Shekara qyzmeti, Memlekettik kúzet qyzmeti, Tótenshe jaǵdaılar mınıstrligi men Ulttyq ulan qataryn toltyratyn bolady. Búgingi kúni 760 almatylyq áskerı boryshyn óteýge attanyp ketti», - dedi Aıdar Músirepov.
Spıker, sondaı-aq, Almatyda kóktemgi áskerge shaqyrý merzimi 1 naýryz – 30 maýsym aralyǵy, al kúzgi shaqyrylym 1 qyrkúıek – 31 jeltoqsan aralyǵynda bolatynyn jetkizdi.