Bıyl asa qaýipti ınfektsııalyq aýrýlarmen syrqattanýdyń jaǵdaıy tirkelgen joq - J.Bekshın
ASTANA. QazAqparat - Qazaqstanda sanıtarııalyq-epıdemıologııalyq jaǵdaı turaqty. Búgin Ortalyq kommýnıkatsııalar qyzmetindegi brıfıng barysynda QR Tutynýshylardyń quqyqtaryn qorǵaý agenttigi tóraǵasynyń orynbasary - Qazaqstannyń Bas sanıtarlyq dárigeri Jandarbek Bekshın osylaı málimdedi.
Vedomstvonyń málimetine qaraǵanda, jyl saıyn memleket ınfektsııalyq aýrýlardyń aldyn alýǵa qomaqty qarjy bólinýde. Sońǵy 7 jylda turǵyndardy ınfektsııalyq aýrýlarǵa qarsy vaktsınalaýǵa bólinetin qarjynyń kólemi 12 esege artyp, 15 mlrd. teńgeni qurady. «Atap aıtqanda, aǵymdaǵy jyldyń ótken kezeńinde oba, tyrysqaq, qutyrma, kúıdirgi, Kongo-Qyrym gemorragııalyq qyzbasy, ish súzegi jáne basqa da asa qaýipti ınfektsııalyq aýrýlarmen turǵyndardyń syrqattanýynyń birde-bir jaǵdaıy tirkelgen joq», - dedi J.Bekshın. Onyń sózine qaraǵanda, jyl saıyn respýblıkada ınfektsııalyq dertterge qarsy 3,8 mln. adamǵa egý sharalary júrgiziledi. Sonyń ishinde 1,3 mln. azamat tumaýǵa qarsy vaktsınalaýdy qamtyp otyr.
