Bıyl «Arqalyq-Torǵaı» tasjoly jóndeledi

Arqalyq qalasynyń ákimi Amantaı Balǵarınniń aıtýynsha, 2018 jyly jol jóndeý, qazba baılyqtaryn ıgerý, logıstıka máselelerine basa mán beriledi.
 

«Arqalyq - Qostanaı oblysynyń ońtústigindegi jalǵyz temirjol toraby. Elbasy Joldaýymen júzege asqan «Arqalyq-Shubarkól» temir jolynyń iske qosylýynyń nátıjesinde logıstıkalyq áleýeti arta tústi. Sondaı-aq, qala Amankeldi, Jankeldın jáne Naýyrzym aýdandarynyń negizgi otyn bazasyna aınaldy. Byltyrǵy jylytý maýsymynda qalaǵa 3713 tonna kómir jetkizildi. 121,1 tonna otyn mazýtyn satyp alýǵa Úkimetten 1 mlrd 219,3 mln teńge somasynda qarajat bólindi», - deıdi qala ákimi.

Bıyl Arqalyqtyń ekonomıkasyn ártaraptandyrý úshin «Qazgeologııa» AQ jáne jeke ınvestorlardyń qoldaýymen paıdaly qazbalar ken oryndaryn qosymsha barlaý jumystary júrgiziledi. Atap aıtqanda, nefrıtoıd, qorǵasyn, mármár, qurylysqa qajetti tas jáne qum ıgerilmek.

Jıynda málim etilgendeı, «Petropavl - Arqalyq - Jezqazǵan» memlekettik mańyzy bar avtomobıl joldarynyń jekelegen ýchaskeleri qaıta jańartýdy qajet etedi. Aktıvte sóz alǵan eńbek ardageri Qaıyrden Jıenbaev pen «Agroınterqus» JShS bas dırektory Aleksandr Lorents qala taǵdyryna qatysty oılaryn ortaǵa saldy.

«Basty problema - avtomobıl joldarynyń jaramsyzdyǵy. «Arqalyq - Qostanaı» kóterme jolynyń sapasy jaqsarǵanymen, «Arqalyq - Astana» tasjoly jóndeýdi qajet etedi. Buǵan qosa «Arqalyq-Jezqazǵan» baǵytynyń 205 shaqyrymy, «Arqalyq-Derjavın» jolynyń 110 shaqyrymy qalypqa kelse, biraz kásipkerlerdiń sharýasy jeńilder edi», - dedi Qaıyrden Jıenbaev.
 

Aıtylǵan máselelerdi túrtip alǵan Vladımır Bojko qazir jol jóndeýdiń basty nazarda ekenin aıtty. Óz kezeginde, qala ákimi «Arqalyq-Torǵaı» baǵytyndaǵy avtokólik jolynyń kúrdeli jóndeý jumystaryn aıaqtaýǵa oblystyq bıýdjetten 370 mln teńge bólinetinin aıtty.

«Parlament Májilisiniń saıtynda árbir depýtattyń jeke paraqshasy bar. Sizder aıtqan usynystar sonda da kelip jatyr. Bári qarjyǵa tireledi. Bul másele oń sheshimin tapsa, tas joldar da jóndeledi», - dedi Bojko.

Májilismen qaladaǵy «Qazaqstan Alıýmınıi» ken basqarmasyna baryp, jumysshylarmen kezdesti.

Taý-ken isi, óńdeý ónerkásibi boıynsha 9 kásiporyn jumys isteýde. Ótken jyly qalanyń ónerkásip ónimderiniń jalpy kólemi 7 mlrd. 200 mln teńge nemese 96,6%-ǵa jetken. Kásiporynda 800-den astam adam qyzmet atqarady.

«Ken basqarmasy Arqalyqtaǵy eń iri jumys berýshi jáne salyq túsiminiń kózi bolyp otyr. Ótken jyly qalalyq bıýdjetke bólingen qarajat kólemi 251 mln teńgeden asty nemese jalpy tabystyń 14% -yn qurady. Shamamen 1 mlrd. 230 mln teńgege otqa tózimdi balshyq eksporttady. Qala ekonomıkasyna shamamen 1 mlrd 800 mln teńge ınvestıtsııa salyndy», - dep málimdedi Torǵaı boksıt ken basqarmasynyń bas ınjeneri Vladımır Romanenko.

Degenmen, boksıt ken qorynyń taýsylýyna baılanysty, kompanııa 2021 jylǵa deıin ońtaılandyrylǵan rejımde jumys istemek.