Bıyl «Altyn belgige» ıe 39 túlek memlekettik grantqa ıe bola almady
ASTANA. QazAqparat - Bıyl «Altyn belgige» ıe 39 túlek memlekettik bilim berý grantyna ıe bola almady. Bul týraly búgin QR Bilim jáne ǵylym mınıstrligi Joǵary jáne joǵary oqý ornynan keıin bilim berý, halyqaralyq yntymaqtastyq departamenti dırektorynyń mindetin atqarýshy Serik Ómirbaev málim etti.
«Bizde 39 «Altyn belgi» ıegeri grant ala almady. Mundaı jaıt qalaı oryn aldy? Óıtkeni, bul sanattaǵylar ádettegideı tek mártebeli mamandyqtarǵa qujat tapsyrady. Al ózderińizde biletindeı, biz jyldan-jylǵa ekonomıkalyq jáne zańgerlik mamandyqtarǵa granttardy azaıtyp kelemiz. Sondyqtan da olardyń grant ala almaı qalýy múmkin», - dedi ol.
Onyń atap ótýinshe, elimizdiń Bilim jáne ǵylym mınıstri joǵary oqý oryndarynyń rektorlaryna atalǵan túlekterge qoldaý kórsetý týraly ótinish jasaǵan.
«Endi «Altyn belgi» ıegerleri sol joǵary oqý ornyna baryp, qabyldaý komıssııasyna ótinish jasaýy tıis. Olardyń ótinishterin qabyldaý komıssııasy mindetti túrde rektorǵa jetkizedi. Barlyq rektorlar eń aldymen «Altyn belgi» ıegerlerine qoldaý kórsetýleri tıis», - dedi S.Ómirbaev.
Onyń atap ótýinshe, mundaı jaıt jylda qaıtalanyp otyrady. Máselen, osydan bes-alty jyl buryn júzden astam «Altyn belgi» ıegeri grantqa ilige almaı qalǵan bolatyn. Degenmen, is júzinde olar jańa oqý jylynda belgili bir joǵary oqý ornyna qabyldanady.
