Bıyl alty aıda Italııamen taýar aınalymy 9 mlrd $ jetti
«Bıyl tamyzda Qazaqstan men Italııa Respýblıkasynyń dıplomatııalyq qarym-qatynasy jańa otyz jyldyqqa aıaq basty. Eki el arasyndaǵy saıası dıalog pen kóptegen máseleler boıynsha ózara túsinistikti eskerip, biz eń aldymen saýda-ekonomıkalyq jáne ınvestıtsııalyq seriktestikke kóńil bólýdi jón kóremiz. Italııa – Eýropadaǵy eń iri saýda seriktesimiz. Byltyr saýdalastyq 14,9 mlrd dollardy qurady. Bıyl qańtar-shilde aılarynda taýar almasý 9 mlrd AQSh dollaryna jetti», - dedi Murat Nurtileý vedomstvoda ótken BAQ ókilderine arnalǵan baspasóz máslıhatynda.
Onyń aıtýynsha, aldaǵy ýaqytta Qazaqstannyń 110 eksporttyq pozıtsııa boıynsha atalǵan kórsetkishti taǵy 900 mln dollarǵa arttyrýǵa áleýeti bar.
«Italııamen energetıka, tabıǵı resýrstardy barlaý jáne óndirý, qurylys, ınfraqurylym, kólik, baılanys, aýyl sharýashylyǵy, ǵylymı-tehnıkalyq qyzmet jáne kadr daıyndaý salasyndaǵy yntymaqtastyqtyń bolashaǵy zor. Italııa – ınvestıtsııa kólemi boıynsha da elimizdiń negizgi seriktesteriniń qatarynda. Qazaqstanǵa 2005 jyldan beri quıylǵan ınvestıtsııalar kólemi 7 mlrd dollardan asty. Qazir elimizde 270-ke jýyq ıtalııalyq kompanııalar jumys isteıdi. Jalpy kólemi 474 mln dollardy qamtıtyn ár túrli salada 21 ındýstrıaldy joba karastyrylyp jatyr», - deıdi vedomstvo basshysy.
Aıta keteıik, búgin Astanaǵa Italııa Respýblıkasynyń Mınıstrler keńesi tórǵasynyń orynbasary – Syrtqy ister jáne halyqaralyq yntymaqtastyq mınıstri Antonıo Taıanı resmı saparmen keldi.
